Prokuroria e Përgjithshme hap në shtator garën për në KLP
Këshilli i Lartë i Prokurorisë aktualisht ka 10 anëtarë
Pas rreth një muaji nga shpallja e vendit vakant në Këshillin e Lartë të Prokurorisë, Prokuroria e Përgjithshme pritet të hapë garën për zëvendësimin e Gentian Osmanit.
Shkarkimi i këtij të fundit nga shkalla e dytë e vetingut, në korrik të këtij viti, la KLPnë me 10 anëtarë, gjendje e cila krijohet për herë të dytë në atë që konsiderohet si qeveria e prokurorëve. Kujtojmë se më herët, është shkarkuar nga shkalla e dytë edhe prokurorja Antoneta Sevdari, e zëvendësuar më vonë me prokurorin Vatë Staka, i cili u zgjodh në një votim pa garë, pasi ishte i vetmi kandidat. Votimi i Stakës u kundërshtua nga një pjesë e prokurorëve, por kjo nuk ndikoi në rezultatin e garës. Plotësimi i KLP- së me 11 anëtarë, para pikëzimit të kandidatëve për kryeprokuror, është mjaft i rëndësishëm, në kushtet kur në rastet e një Këshilli me 10 anëtarë, vota e kryetarit është vendimtare, duke prishur kështu balancat. Prokuroria e Përgjithshme kishte mundësinë që ta çelte garën që disa javë më parë, por priti fillimin e sezonit të ri të punës.
PËRZGJEDHJA Pas çeljes së garës, kandidatët e interesuar do të kenë kohë rreth dy javë për të shprehur interesin dhe më pas do të jetë Mbledhja e Përgjithshme e Prokurorëve që do të votojë një prej kandidatëve. Në këto kushte, plotësimi i vendit bosh në Këshillin e Lartë të Prokurorisë do të marrë kohën e tij dhe kandidati i 11 do të plotësojë KLPnë pas një muaji.
KRITERET Duke iu referuar ligjit për organet e reja të drejtësisë, parashikohet se kandidatët duhet që në kohën e kandidimit, të kenë ushtruar funksionin e prokurorit për të paktën 10 vjet. Në kohën e kandidimit, nuk duhet të jenë drejtues të një zyre prokurorie ose anëtarë të organeve drejtuese të grupeve të interesit, të tilla si shoqata prokurorësh apo sindikata prokurorësh. Të jenë vlerësuar të paktën "shumë mirë" në dy vlerësimet e fundit të etikës dhe veprimtarisë profesionale dhe të mos kenë masë disiplinore në fuqi. Një tjetër kriter i parashikuar në ligj është të mos kenë qenë dënuar më parë me vendim gjyqësor të formës së prerë për kryerjen e një vepre penale. Gjithashtu, të mos kenë qenë anëtarë, bashkëpunëtorë ose të favorizuar të ish- Sigurimit të Shtetit para 2 korrikut 1991 në kuptimin e ligjit "Për të drejtën e informimit për dokumentet e ish- Sigurimit të Shtetit të Republikës Popullore Socialiste të Shqipërisë". Të mos jenë bashkëpunëtorë, informatorë ose agjentë të shërbimeve sekrete. Në kohën e kandidimit, të mos kenë asnjë anëtar të familjes, sipas kuptimit të ligjit "Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë", dhe të afërm të shkallës së parë, që është anëtar në detyrë i Këshillit ose kandidat për anëtar.
SHKARKIMET Prokurori Gentian Osmani u shkarkua nga Kolegji i Posaçëm i Apelimit, pasi më herët ishte konsideruar i përshtatshëm nga Shkalla e parë. Pas ankimit të vendimit nga Komisioneri Publik, KPA, e gjeti të pajustifikuar pasurinë e Osmani dhe e shkarkoi atë. Më herët, ka qenë ish- prokurorja Antoneta Sevdari, e cila u shkarkua nga Shkalla e Dytë e organeve të vetingut duke e lënë KLP- në me 10 anëtarë. Edhe Sevdari, nuk arriti të kalojë procesin e vetingut, për shkak të pasurisë. Largimi i ishprokurores është një nga vendimet më të kontestuara të organeve të vetingut. Kundër kanë qenë edhe vëzhguesit ndërkombëtarë, të cilët me anë të një opinioni, shprehnin rezerva për interpretimin që Kolegji i kishte bërë ligjit në këtë rast.