Britani, Johnson bllokon punën e Parlamentit deri më 14 tetor
Parlamenti britanik do të pezullohet vetëm disa ditë pasi deputetët të kthehen në punë në shtator, dhe vetëm disa javë përpara afatit të Brexit- it. Kryeministri, Boris Johnson, tha se fjalimi i Mbretëreshës do të zhvillohet pas pezullimit të punës së Parlamentit, pra më 14 tetor, për të përshkruar “programin e tij shumë emocionues”. Por kjo do të thotë se koha që deputetët duhet të punojnë për të miratuar ligje, për të ndaluar një largim nga BE pa marrëveshje më 31 tetor, do të shkurtohet shumë. Liderët e zemëruar opozitarë e kanë cilësuar kërkesën e Johnson si një përpjekje të qëllimshme për të penguar ligjvënësit që të bllokojnë një Brexit pa marrëveshje. Kryetari i Dhomës së Përfaqësuesve, John Bercow, tha se kjo ishte një “shkelje kushtetuese”. Lideri opozitar, Jeremy Corbyn, ka thënë se ky veprim “përbën kërcënim për demokracinë tonë”. Ndërsa zyrtari i BE- së për Brexit, Guy Verhofstadt, e ka cilësuar veprimin e Johnson, “të ligë”. Johnson, në anën tjetër, i ka mohuar këto pretendime. Ai u zgjodh Kryeministër pak javë më parë dhe menjëherë është zotuar se Britania do të largohet nga blloku evropian në fund të muajit tetor, me apo pa marrëveshje me BE- në. Kritikët vlerësojnë se një Brexit pa marrëveshje do ta çonte Britaninë drejt një kaosi ekonomik dhe do të dëmtonte tregtinë e saj me 27 vendet anëtare të BE- së. Por, Presidenti amerikan, Donald Trump, e ka përshëndetur vendimin e Johnson. “Boris është pikërisht ai për të cilin ka qenë duke kërkuar Britania dhe ai do ta dëshmojë që është i mrekullueshëm. E dua Britaninë”, ka shkruar Trump. Të mërkurën, Mbretëresha Elisabeth II e ka miratuar zyrtarisht kërkesën e Kryeministrit Johnson për të pezulluar punën e Parlamentit. Miratimi nga Mbretëresha britanike ishte veprim formal, pasi asaj i kërkohet të jetë neutrale në aspektin politik dhe të veprojë siç këshillohet nga Qeveria.