Kosovë, partitë e kanë nisur tashmë fushatën e 25 shtatorit
Partitë politike në Kosovë, të cilat janë duke punuar për krijimin e koalicioneve të tyre, duket se e kanë nisur “de facto” fushatën zgjedhore. Fushata pritet të fillojë më 25 shtator dhe do të zgjasë dhjetë ditë. Por, partitë dhe koalicionet kanë nisur aktivitetet zgjedhore. Prioritet në platformat e tyre me sa duket është zhvillimi ekonomik dhe fuqizimi i subjektivitetit të shtetit, si pika kryesore të përbashkëta në platformat e deritashme. Sipas mediave në Kosovë, prezantimi zyrtar i platformave pritet të ndodhë gjatë fushatës, por partitë politike i kanë tashmë pikat kryesore programore, me të cilat konkurrojnë për të marrë besimin e qytetarëve për qeverisjen e ardhshme katërvjeçare. “Express” shkruan se Partia Demokratike e Kosovës, ka prezantuar si qëllim kryesor kryesisht luftimin e korrupsionit dhe krimit të organizuar. Kreu i saj, Kadri Veseli, ka thënë se “Ndryshimi fillon me luftën kundër korrupsionit, për të krijuar mundësi të barabarta, për t’i mbajtur të rinjtë këtu dhe për ta ndërtuar një ekonomi të fuqishme”. Ndërsa Lidhja Demokratike e Kosovës ka sulmuar PDK- në, me deklaratën se “ata që e kanë kultivuar korrupsionin dhe nepotizmin, nuk mund ta luftojnë as njërën e as tjetrën”. Në programin e saj qeverisës, LDK e ka theksin në zhvillimin ekonomik, si në sektorin privat, ashtu edhe në atë publik. Kandidatja për Kryeministre e LDK, Vjosa Osmani, do të fokusohet që nga arsimi e shëndetësia, e deri te luftimi i krimit, korrupsionit dhe kapjes së shtetit, siç është shprehur ajo. Lëvizja Vetëvendosje nuk ka qenë asnjëherë në pushtet në nivelin qendror. Zyrtarët e këtij subjekti politik thonë se programi i Vetëvendosjes fokusohet në tri shtylla: shtetin e së drejtës, shtetin zhvillimor dhe shtetin social. Nga Aleanca për Ardhmërinë e Kosovës, në garë me Partinë Socialdemokrate, po punojnë për sovranitet të mëtejmë të Kosovës, por edhe për ekonomi e drejtësi, sipas “Europa e Lirë”.