Short ferri për Interin, Gjimshiti sfidon Sitin

Zikaltrit sfidojnë Barçën dhe Borusian, sërish Liverpul- Napoli. Reali me PSG- në

Qajnë goglat e Montekarlos për Interin, që për të kaluar fazën e parë të Ligës së Kampioneve, duhet të lërë pas njërën mes Barcelonës dhe Borusias së Dortmundit, përveç Sllaviës së Pragës.

Shorti i fazës së grupeve rezervoi si për Juventusin, ashtu edhe për Napolin kundërshtare të forta ( Atletiko e Madridit për kampionët e Italisë) dhe Liverpulin ( kampionen në fuqi të Europës për ekipin e Hysajt), por të paktën në letër kualifikimi nuk mund të vihet për asnjë moment në dyshim. Buzëqesh Atalanta debutuese ku luan Gjimshiti, pasi do të ndeshet për herë të parë në elitën e futbollit kontinental me kampionët e Anglisë, Mançester Sitin, por emrat e dy kundërshtarëve të tjerë nuk janë të frikshëm në Grupin C, Dinamo e Zagrebit dhe ukrainasit e Shahtjor Donjeckut. Përveç kënaqësisë së një përballjeje me futbollin "guardiolian", Atalanta, në Grupin C, shpreson të masë forcat me Shahtjorin dhe kroatët e Dinamos së Zagrebit. Nis nga këtu gara për të ngritur trofeun me veshë të mëdhenj në finalen e 30 majit 2020 në stadiumin olimpik "Ataturk" të Stambollit. Juventusi, vendosur në Grupin D, rigjen Atletikon e Madridit, që e eliminoi sezonin e shkuar në 1/ 8- at, pas fitores 3- 0 në Torino, ndërsa në Madrid ishte mundur 20. Por edhe Bajern Leverkuseni është një forcë e tretë për të mos u nënvlerësuar. Interi, i pozicionuar në Grupin F, u përball me Barcelonën edhe vitin e shkuar ( humbi 2- 0 në "Camp Nou" dhe barazoi 1- 1 në Milano). Por, rreziku tjetër vjen nga Dortmundi i Vazos së dytë. Edhe Napoli ( Grupi E) gjendet përballë një kundërshtari të sezonit të shkuar, Liverpulit. Atëherë fitonin 1- 0 të dyja skuadrat në shtëpi. Përballje interesante ofrojnë edhe dy grupe të tjera: në të parin, Reali, kundërshtari më i frikshëm i Vazos 2, u shortua me PSGnë, plus belgët e Bryzhit dhe turqit e Gallatasarajit. Grup interesant është edhe ai B, ku Bajerni dhe Totenhemi janë favoritet e padiskutueshme për të prerë biletën në 1/ 8at, me grekët e Olimpiakosit dhe serbët e Cërvena Zvezdës, që do synojnë të prishin punë. Grupet e fundit, G dhe H, janë si për nga radha, edhe më të lehtët. I buzëqesh fati Çelsit, që gjen Ajaksin, surprizën e sezonit të shkuar, por këtë vit pa dy liderët, De Ligtin dhe De Jongun. Dy ekipet e tjera që plotësojnë Grupin H janë Valencia dhe Lila. Grupi më i ekuilibruar në letër do të jetë ai G, ku Zeniti dhe Benfika do të masin forcat me Lionin dhe Lajpcigun.