‘ Al Jazeera’ përaudio- përgjimet: Asnjë nga zyrtarët e lartë të implikuar nuk është arrestuar
“Partia qeverisëse i ka shtrembëruar akuzat, asnjë nga zyrtarët e implikuar nuk ka shkuar në Gjykatë, gjyqësori akuza denoncuesve”
Duke iu referuar lajmeve për audiopërgjimet e publikuara muajt e kaluar nga “Bild”, VOA dhe BIRN, në të cilat rezultojnë të përfshirë eksponentë të Partisë Socialistë, përfshirë edhe vetë Kryeministrin Edi Rama, teksa flasin për “arritje të objektivit”, “Al Jazeera” u ka bërë jehonë zhvillimeve të fundit politike në vendin tonë, për të cilat thotë se deri më tani, “asnjë nga zyrtarët e lartë të implikuar nuk është arrestuar”.
Në shkrimin bashkangjitur videos me publikimet e agjencive të lajmeve prestigjioze, por dhe raportimeve nga Tirana, “Al Jazeera” shkruan se: “Këtë janar të kaluar, një shkrim i dy mediave digjitale në Shqipëri konfirmoi atë që shumëkush në vend dyshonte prej kohësh se marrëdhëniet midis politikanëve, gjyqësorit dhe krimit të organizuar janë shumë të ngushta. BIRN dhe ‘ Zëri i Amerikës’ publikuan një seri audiopërgjimesh të rrjedhura midis zyrtarëve qeveritarë – përfshirë Kryeministrin Edi Rama – dhe bosëve të krimit, të cilët mund të dëgjohen të pohojnë për manipulimin e zgjedhjeve të vitit 2016 dhe 2017.
Megjithatë, asnjë nga zyrtarët e lartë të implikuar nuk është arrestuar. Në vend të kësaj, gjyqësori u ka shkuar pas atyre që kanë zbuluar dhe botuar materialin”.
“Të kthehemi te vendi që nuk merr shumë mbulim mediatik, Shqipëria dhe një histori e publikuar nga dy agjenci lajmesh digjitale, që konfirmojnë atë që shumë persona atje e dyshonin, që marrëdhënia mes politikës, gjyqësorit dhe krimit të organizuar, është shumë larg komfortit. Lajmi u bë publik këtë janar. BIRN dhe VOA publikuan një seri audio- përgjimesh, telefonatash mes zyrtarëve të lartë të qeverisë, përfshirë Kryeministrin Edi Rama dhe bosëve të krimit, teksa bashkëpunojnë për të manipuluar zgjedhjet si ato të 2016- ës ashtu edhe ato të 2017- ës. Këto janë revolucione të tipit që vijnë me pasoja. Megjithatë, partia qeverisëse ose i ka pezulluar, ose i ka shtrembëruar akuzat dhe asnjë nga zyrtarët e implikuar nuk është arrestuar, lëre pastaj të dalë para gjykatës. Në vend të kësaj, gjyqësori ka shkuar pas atyre që publikuan materialet,” komenton spikeri i lajmeve të “Al Jazeera” për situatën në Shqipëri.
RAPORTIMI Nga Shqipëria, gazetarja investigative, Johanna Hus, raporton situatën kaotike politike në vend dhe merr në intervistë ata pak gazetarë të cilët, sipas “Al Jazeera”- s, pushtetarët po përpiqen të vrasin.
“Koka e një rrjeti të organizuar kriminal në Shqipëri dhe një zyrtar i lartë i shtetit, flasin për intimidim zgjedhor para zgjedhjeve të përgjithshme të 2017- ës. Një zyrtar i lartë, i cili përditëson Kryeministrin për votat e blera. Një bos krimi, që i premton Partisë Socialiste qeverisëse një tjetër fitore. Një anëtar i mafies shqiptare, që përgëzon ministrin për një rezultat zgjedhjesh hyjnore. Këto ishin vetëm maja e ajsbergut nga një seri audiopërgjimesh shpërthyese që e çojnë Shqipërinë në një kaos politik”, shprehet gazetarja e “Al Jazeera”- s në raportimin e saj nga Tirana.
PUBLIKIMI Në qershor të këtij viti, gazeta gjermane “Bild” publikoi pjesë të dosjes nr. 184 të Prokurorisë së Krimeve të Rënda ku në 16 sekuencat e publikuara nga gazetari gjerman Piter Tiede, rezultojnë Kryeministri i vendit, Edi Rama, ish- ministri, Damian Gjiknuri, ish- deputetet, Pjerin Ndreu dhe Artan Gaçi, Arben Keshi, drejtor në Ministrinë e Brendshme, shefi i komisariatit numër 5, Sali Skura, si dhe drejtori i zyrës arsimore të Dibrës. Në përgjimet e publikuara, gazetari gjerman ka siguruar edhe telefonatën e drejtorit të Ministrisë së Brendshme, Arben Keshi, me drejtorin rajonal në Dibër. Keshi kërkon nga drejtori i Arsimit në Dibër të telefonojë drejtorët e shkollave për t’i kujtuar ata të votojnë për PS- në në të kundërt, një ditë pas zgjedhjeve në Dibër, të gjithë do të jenë të pushuar. Drejtori i Arsimit e garanton atë se do t’i telefonojë të gjithë, drejtorë e mësues. Në përgjimin numër tetë, shfaqet biseda mes shefit të komisariatit të Kamzës dhe drejtorit në Ministrinë e Brendshme, Arben Keshi. Shefi i komisariatit të Kamzës i thotë Keshit se kreu i Bashkisë së Kamzës ka nisur 450 njerëz me furgon drejt Lurës dhe Recit. Kjo lëvizje duket se e shqetëson shumë drejtorin e Ministrisë së Brendshme. Ish- ministri i Transporteve, Damian Gjiknuri, është përgjuar teksa flet ne telefon me Bekim Krashin, biznesmen, i cili është angazhuar për zgjedhjet në Dibër me Partinë Socialiste. Sipas përgjimit të “Bild”, Gjiknuri i kërkon llogari biznesmenit se kush është angazhuar në një komunë të caktuar dhe që ka mbuluar pjesën e transportit të parave. Biznesmeni Bekim Krashi ( një biznesmen i zonës që merret me mermerin) dhe një person i paidentifikuar flasin për paratë që janë shpërndarë për blerjen e votave. Personi i paidentifikuar pyet se sa para mund të ofrojnë për një votë, sepse ai ka dy familje, në total 5 vota. Çmimi për një votë është rreth 4.000 lekë.