Rama: Gati 11 konvikte, administrimi nga vetë studentët në çdo kat

Studentët që jetojnë në konvikt do të kenë mundësi edhe për t'u punësuar në këto godina, pa u shkëputur nga studimet. Lajmi është dhënë nga kreu i Bashkisë së Tiranës, Erion Veliaj, i cili gjatë një inspektimi së bashku me Kryeministrin Edi Rama, vuri theksin te punësimi i të rinjve, kundrejt një pagese minimale, që do të shërbejnë si administratorë për mirëmbajtjen e godinave të reja të konvikteve. "Në Qytetin Studenti, ne punësojmë shumë staf, recepsionistë, administratorë etj.. Çdo gjë ka nevojë për t'u mirëmbajtur. Menduam që ideja më e mirë, meqë specialistët janë me paga minimale, është që ne mund të punësojmë studentë. Pra, do të hapim disa vende pune dhe do t'u themi që kemi disa vende pune si administratorë. Po u prishën dushet, po ndodhi diçka, apo ndonjë problem tjetër kemi një administrator që është një prej studentëve", tha Veliaj. Kryeministri Rama postoi në llogarinë e tij në "Facebook" se ka përfunduar riskostruksioni i 11 godinave në Qytetin Studenti. "Në Qytetin Studenti, ku ka përfunduar rikonstruksioni i 11 konvikteve dhe janë drejt përfundimit edhe 6 godina të tjera. Për herë të parë, godinat do të administrohen nga vetë studentët. Në çdo godinë e në çdo kat një student do të jetë përgjegjës për zgjidhjen e çdo problemi me mirëmbajtjen dhe mbarëvajtjen e punëve të godinës. Ndërkohë, kantieret janë hapur edhe në konviktet e Korçës, Shkodrës, Elbasanit, së shpejti edhe në Vlorë e Gjirokastër. Pakti për universitetin", shkruan Rama. Drejtoresha e Rezidencave Studentore, Anila Shehu, tha se çdo kat dhe godinë do të ketë nga një administratorë, i cili do të jetë ' zëri' i studentëve të tjerë lidhur me problematikat e mundshme që mund të hasin gjatë jetesës së tyre studentore në këto godina." Kemi gjithashtu një përfaqësues student për çdo konvikt, kemi një përfaqësues për kat, i cili gjatë gjithë kohës zgjidh edhe problemet e mirëmbajtjes, edhe problemet e bashkëjetesës, por edhe probleme të ndryshme që mund të kenë studentët. Kur kemi nga një përfaqësues për konvikt është më e thjeshtë për të komunikuar me të gjithë studentët", tha Shehu.