Asnjë i dyshuar për vrasjen e ish- policit Santjago Malko
Hetimet për vrasjen e ishpolicit Santjago Malko nuk kanë dhënë asnjë rezultat deri më tani, sa i takon identifikimit të autorëve. Në makinën e djegur, burime thonë se nuk janë gjetur gjurmë, që mund të identifikonin personat që kanë qëlluar për vdekje të riun. Nga mënyra e kryerjes së krimit dhe veprimit të personave të implikuar duket se plani është i mirëmenduar, ndërsa Policia mendon se kemi të bëjmë me vrasës me pagesë. Hetuesit kanë sekuestruar një numër të lartë të kamerave të sigurisë dhe është duke u bërë këqyrja e tyre për të parë nëse janë kapur lëvizje të autorëve, që do të çonin në zbulimin e identitetit të tyre. Materialet janë referuar në Prokurorinë e Tiranës, prej më shumë se dy ditësh, por asnjë emër nuk është regjistruar si i proceduar, ndërkohë hetimet e mëtejshme janë duke u vazhduar nën drejtimin e Akuzës së kryeqytetit. Malko u vra mbrëmjen e 27 gushtit, në momentin që po dilte nga një lavash në rrugën “Xhanfize Keko”. Me të paktën 10 plumba dyshohet se është qëlluar në drejtim të Santjago Malkos, ndërsa Policia është duke hetuar pistën e hakmarrjes dhe të ndonjë larjeje hesapesh. Nga verifikimi i automjetit tip “Mercedez Benz”, që u gjet i djegur pas atentatit në fshatin Ferraj, Policia ka zbuluar se ishte vjedhur para një viti në Lezhë. Madje, pronari i makinës kishte bërë denoncim për vjedhje në Policinë e Lezhës. Ndërsa targat që i ishin vendosur makinës, nuk përkojnë me targat reale të saj. Këto targa rezultuan të ishin vjedhur një tjetër automjeti në Krujë. Të gjitha këto detaje dëshmojnë për një krim të planifikuar dhe të organizuar prej kohësh nga ana e atentatorëve dhe e porositësve të krimit. Burime nga grupi hetimor thanë një ditë pas ngjarjes se nisur nga provat e grumbulluara në vendngjarje, dëshmitë, por edhe rindërtimi i skenës së krimit, rezulton që në vrasjen e Malkos të kenë marrë pjesë disa autorë. Duke nisur nga persona që mund ta kenë mbajtur nën vëzhgim, atentatori që ka shkrepur armën, ai që ka drejtuar makinën, e cila dyshohet t’i ketë prerë rrugën mjetit “BMw X5” të ish- policit, por edhe persona të tjerë që kanë djegur makinën tjetër, e cila u gjet e djegur në fshatin Ferraj. Në këtë makinë janë gjetur dhe sekuestruar 2 armë automatike, që dyshohet të jenë përdorur në krim. Aktualisht, armët janë dërguar për ekspertim në Laboratorin e Kriminalistikës.