Me 32 kg kanabis në makinë, kapet në Qafë- Botë i riu
Makina e 34- vjeçarit, në kontroll të imët pas dyshimeve
SARANDE - Policia Kufitare në Qafë- Botë ka arritur të parandalojë një rast të trafikimit të lëndës narkotike nga Shqipëria në Greqi. Uniformat blu informojnë se kanë arrestuar një 34- vjeçar banues në Sarandës, pasi në makinën e tij janë gjetur 32 kg lëndë narkotike. Nga Policia Kufitare bëjnë me dije se janë duke bashkëpunuar me autoritetet greke, me qëllim që të zbulohen edhe pritësit e kanabisit. Mësohet se Shërbimet e Policisë Kufitare të Sarandës në bazë të analizës së riskut kanë çuar për kontroll në vijën e dytë një automjet, për të cilin dyshonin se mund të transportonte lëndë narkotike. Gjatë kontrollit të ushtruar në automjet, duke përdorur edhe qenin antidrogë, kanë konstatuar se në brendësi të tij kishte lëndë narkotike. Menjëherë është njoftuar grupi hetimor dhe Specialistët për Hetimin e Narkotikëve në Komisariatin e Policisë Sarandë, të cilët pas kontrollit të imtësishëm të automjetit, kanë gjetur dhe sekuestruar në brendësi të mjetit rreth 32 kg canabis sativa. Në përfundim të veprimeve të para hetimore, Specialistët për Hetimin e Narkotikëve kanë arrestuar në flagrancë drejtuesin e mjetit shtetasin: N. R., 34 vjeç, banues në Sarandë. Policia Kufitare ka shkëmbyer menjëherë informacion me homologët grekë për të bërë të mundur kapjen dhe arrestimin e pritësit të lëndës narkotike. Ndërkohë në bashkëpunim me Prokurorinë, Specialistët për Hetimin e Narkotikëve vijojnë punën për zbardhjen e plotë të kësaj tentative, me qëllim identifikimin dhe kapjen e personave të tjerë të implikuar. sh. d