Cakaj: Kemi përmbushur kushtet teknike për çeljen e negociatave
Ministri për Europën dhe Punët e Jashtme, Gent Cakaj, gjatë takimeve me homologët e tij europianë në takimin joformal të ministrave të Jashtëm të Bashkimit Europian dhe Ballkanit Perëndimor, konfirmoi se Shqipëria i ka përmbushur kushtet teknike për çeljen e negociatave me Be- në. Ai zhvilloi takime me ministrat e Jashtëm të Danimarkës, Rumanisë, Kroacisë, Çekisë, Sllovenisë dhe me Sekretaren e Shtetit për Çështjet Europiane të Portugalisë. Ministri slloven, Miroslav Cerar, vlerësoi kriteret e plotësuara nga Shqipëria për të merituar çeljen e negociatave me BE. Ministri Cerar siguroi ministrin Cakaj për mbështetjen e Sllovenisë për të mundësuar një vendim pozitiv në mbledhjen e ardhshme të Këshillit në tetor. Gjatë takimit me ministrin e ri kroat, Gordan Grlic- Radman, ky i fundit rikonfirmoi mbështetjen e fuqishme dhe aktive të Kroacisë për çeljen e negociatave të Shqipërisë me BE- në, duke ritheksuar qëndrimin e palëkundur për integrimin e plotë të Ballkanit Perëndimor në Bashkimin Europian si një nga prioritetet e pritshme kryesore të presidencës së ardhshme kroate të BE- së. Ministri danez, Jeppe Kofod, vlerësoi progresin e bërë deri tani në drejtim të plotësimit të prioriteteve kyçe, si dhe inkurajoi ministrin Cakaj për vazhdimin e reformave në vend. Ai siguroi për një vlerësim të drejtë mbi bazën e arritjeve për çeljen e negociatave për anëtarësim. Ministrja rumune, Ramona Manescu, siguroi për vijimin e mbështetjes së Rumanisë, të shprehur edhe gjatë presidencës së tyre për avancimin e vendit tonë në procesin e integrimit europian nëpërmjet hapjes sa më parë të bisedimeve të anëtarësimit.