Skleroza Multiple, si duhet kuptuar dhe trajtuar
SSkleroza Multiple është një sëmundje kronike, që prek sistemin nervor duke shkaktuar një sërë simptomash të mundshme, përfshi problemet me shikimin, lëvizjen e krahëve ose të këmbëve, ndjeshmërinë ose ekuilibrin. Kjo sëmundje mund të shfaqet në çdo moshë, por më e zakonshme është në moshat 20- 30 vjeç dhe haset 2- 3 herë më tepër te femrat sesa te meshkujt. Lodhje, vështirësi në ecje, probleme me shikimin, si p. sh.: shikim i paqartë, mpirje ose ndjesi si shpim me gjilpërë në pjesë të ndryshme të trupit dhe probleme me ekuilibrin dhe orientimin, janë disa nga shenjat që duhet të na orientojnë drejt kësaj sëmundjeje. Në varësi të tipit të Sklerozës Multiple që individi ka, simptomat mund të shfaqen dhe të ikin në faza të ndryshme, por edhe mund të përkeqësohen në vazhdimësi. Më shumë se 8 në 10 individë me SM janë të diagnostikuar me tipin përsëritës të SM- së. Një individ me SM përsëritëse do të ketë episode me simptoma të reja ose të përkeqësuara. Këto simptoma zakonisht përkeqësohen për disa ditë, zgjasin ditë, javë ose muaj dhe më pas përmirësohen ngadalë gjatë një periudhe të ngjashme me fillimin e simptomave. Episodet përsëritëse shpesh ndodhin pa paralajmërim, por në përgjithësi lidhen me një periudhe stresi apo sëmundjeje.
TRAJTIMI
Aktualisht nuk ka një mjekim për SM- në, por disa trajtime mund të ndihmojnë kontrollin e gjendjes shëndetësore. Trajtimi që i nevojitet një pacienti varet nga simptomat specifike dhe nga vështirësitë që ai ka.
Trajtimi mund të përfshijë:
Trajtimet specifike për simptomat individuale të SM- së. Trajtimin e rasteve të përsëritura me ilaçe steroide për të përshpejtuar rikuperimin.
Trajtimin për të zvogëluar numrin e episodeve të përsëritura, duke përdorur ilaçe të quajtura terapia për modifikimin e sëmundjes.
Terapitë e modifikimit të sëmundjes mund të ndihmojnë gjithashtu për të ulur apo ngadalësuar përkeqësimin e përgjithshëm të paaftësisë te pacientët me SM përsëritëse apo me SM progresive dytësore, të cilët zhvillojnë episode përsëritëse. Aktualisht, nuk ka asnjë mjekim që mund të ulë apo ngadalësojë progresin e SM- së progresive parësorë ose SM- së progresive dytësore kur episodet përsëritëse mungojnë.