Ekspertët e “Venecias” 5 orë në Tiranë, kreu i SHISH thirret për “djegien e Parlamentit”
Meta: Vendi, jo në këtë situatë nëse do ishin zbatuar rekomandimet e Venecias
Ekspertët e Komisionit të Venecias zhvilluan dje 5 orë takime duke filluar me Presidentin Meta, Kryeparlamentarin Ruçi, kreun e grupit të PS, Balla, por dhe me opozitën parlamentare dhe jo parlamentare. Ata janë ftuar nga Kuvendi i Shqipërisë për të mbledhur fakte të cilat do ta ndihmojnë Komisionin që të dalë më pas me një opinion në lidhje me kushtetutshmërinë e veprimeve të kreut të shtetit për anulimin e zgjedhjeve të 30 qershorit. Presidenti Meta vlerësoi takimin me ekspertët e Venecias, duke u shprehur me një mesazh në rrjetet sociale. “Kënaqësi të prisja sot një përfaqësi të Komisionit të Venecias. Nëse do ishin respektuar # rekomandimet e tyre në të kaluarën, # Shqipëria kurrë nuk do të ishte në këtë situatë”, tha Ilir Meta. Ndërkohë, nëpërmjet një njoftimi për mediat pas takimit, Kryetari i Kuvendit, Gramoz Ruçi, tha se ka diskutuar me ekspertët edhe për situatën politike në Shqipëri. “Kuvendi i Shqipërisë i është drejtuar Komisionit të Venecias për disa reforma të rëndësishme ose çështje me interes të veçantë, si reforma në drejtësi, vetingu i funksionarëve të lartë, procedurat në lidhje me shkarkimin e Presidentit të Republikës, ligjin për pronësinë si edhe nismën legjislative të zgjedhësve. Kuvendi i Shqipërisë ka përfituar edhe nga opinionet që Komisioni ka adresuar për vende e tjera anëtare të Këshillit të Europës”, tha Ruçi. Ekspertët e Venecias e nisën ditën me opozitën jashtëparlamentare. Në përfundim të takimit, ish- deputeti Oerd Bylykbashi akuzoi qeverinë se me procedurën e shkarkimit të Presidentit kërkon të kapë institucionin. Ndërkohë, e konsideroi aktin e kreut të shtetit për anulimin e zgjedhjeve të 30 qershorit, një akt fisnik për të garantuar pluralizmin politik. “Ne ua bëmë të qartë se kjo është një përpjekje e qeverisë që, në mungesë të Gjykatës Kushtetuese, në themelet e një krize kaq të madhe, Parlamenti përpiqet të tërheqë Komisionin e Venecias dhe Këshillit të Evropës në lojën e tij të turpshme për të kapur të gjitha pushtetet, përfshirë Presidentin e Republikës. Kushtetuta është e qartë. Presidenti i Republikës shkarkohet vetëm nga Gjykata Kushtetuese, nëse ka shkelur rëndë Kushtetutën”, u shpreh Bylykbashi. Ndërkohë, me deputetët e opozitës së re, ekspertët kanë shkëmbyer pikëpamje të ndryshme për rolin e tyre.