Tokat e zëna nga shteti, tani Agjenci për Shpronësimet
Balluku: I jep zgjidhje problematikës së shpronësimeve
Siç ishte paralajmëruar, se me vjeshtën do të vinte edhe zgjidhja e problematikës së shpronësimeve. Ministrja e Infrastrukturës dhe Energjisë, Belinda Balluku, ka shuar dje të gjitha dilemat duke bërë të qartë se zgjidhja nuk do të vijë përmes ndryshimeve ligjore, por përmes ngritjes së një institucioni, që do të kontrollojë dhe menaxhojë të gjithë këtë proces. Gjatë analizës së performancës së agjencive dhe institucioneve që janë nën varësi të kësaj ministrie, Balluku shpjegoi rolin që do të ketë kjo agjenci. "Ne kemi nisur punën për të krijuar Agjencinë e Shpronësimeve për interes publik, e cila do të jetë një agjenci ku do të përqendrohen të gjitha procedurat e shpronësimeve, por sigurisht, gjatë krijimit të kësaj agjencie ne po shikojmë dhe bazën ligjore dhe të gjitha elementet rregullatore të këtij procesi, për t'i thjeshtësuar, për t'i vendosur në një kuadër ligjor të qartë dhe pa ekuivokë dhe për t'u krijuar përmes kësaj agjencie të gjitha projekteve mundësinë që të zhvillohen. Gjithashtu, duke u dhënë pronarëve, të cilët do të shpronësohen në mënyrë sa më të shpejtë, duke i plotësuar dhe kërkesat që ata kanë mbi truallin e tyre dhe duke arritur të nxjerrim nga ky proces një produkt të mirë për të gjitha palët". Në fjalën e mbajtur, ministrja u ndal edhe në projekte të tjera, të cilat pritet të marrin jetë në muajt në vijim. Aktualisht, vuri në dukje Balluku, ka nisur faza e studimit për krijimin e Qendrës së Menaxhimit të Trafikut Rrugor, si dhe projekti për ndriçimin led të të gjitha akseve kombëtare. Një tjetër shqetësim është ai i aktivitetit të linjave të transportit ndërqytetës, për të cilin Balluku tha se deri në qershorin e vitit të ardhshëm do të jetë gati strategjia për funksionimin dhe mirëmenaxhimin e këtij sektori, që ka prodhuar jo pak probleme. "Besojmë që me një bashkëpunim shumë të ngushtë dhe sinergji mes Drejtorisë së Përgjithshme të Transportit Rrugor Shqiptar dhe MIE- s, ne të arrijmë të dizenjojmë një strategji të mirëfilltë për linjat ndërqytetëse. Kështu që, përveç shërbimit që duhet t'u ofrojmë qytetarëve, e vlerësojmë këtë si një element bazë për mbështetjen e strategjisë së turizmit dhe unë besoj që deri në muajin qershor të 2020- ës, e gjitha kjo strategji dhe i gjithë procesi i rimëkëmbjes së linjave ndërqytetëse do jetë i përfunduar dhe në verën e vitit tjetër, sezoni turistik, por dhe qytetarët, do të marrin e do të shijojnë rezultatet e këtij procesi", u shpreh ministrja Balluku.