Nis legalizimi i shtëpive para 1990, lista me familjet e para që marrin tapinë
Përfituesit në kryeqytet duhet të paraqiten pas 30 ditësh
Një vit nga marrja e vendimit për t'i hapur rrugë regjistrimit të banesave para ' 91, është bërë publike edhe lista me përfituesit e parë.
Agjencia e Kadastrës Tirana Rurale ka publikuar dje emrat e 30 familjeve, të cilat në përfundim të afatit 30- ditor mund të paraqiten në sportelet e këtij institucioni për të ndjekur vijimin e procedurave.
PROCESI
Sikundër parashikon edhe vendimi i miratuar në korrik të vitit që shkoi, lista me familjet që janë në proces shqyrtimi dërgohet pranë bashkisë. Do të jetë kjo e fundit që do të bëjë konfirmimet e nevojshme. Një muaj pas kësaj, qytetarët do të njoftohen sërish nga Kadastra për vijimësinë e procesit. Mbi bazën e vendimit, familjet që kanë në posedim shtëpi të ndërtuara para vitit 1991 nuk kanë asnjë detyrim për të siguruar dokumentet e nevojshme, me përjashtim të rasteve kur i posedojnë ato, siç mund të jenë leje ndërtimi të vjetra, akte pronësie, skica genplane, akte shitblerjeje apo posedimi, vendime të vjetra të Këshillave Popullorë, apo dokumente të tjera provuese. Sa u takon formularëve të aplikimit, ata mund të plotësohen pranë çdo drejtorie. Referuar procedurave të parashikuara në vendim, brenda 30 ditëve nga dorëzimi i kërkesës, punonjësit e Kadastrës duhet të bëjnë të gjitha verifikimet e nevojshme. Për kalimin e pronësisë deri në 300m2 nuk aplikohet asnjë tarifë. Pra, familjet janë të përjashtuara nga detyrimi financiar. E vetmja faturë që ata do të paguajnë është ajo për shërbimin, e cila shkon 8000 lekë. Por regjistrimi deri në 300m2 falas nuk i privon qytetarët, pasi ata kanë të drejtë të aplikojnë deri për 500m2 tokë, me ndryshimin që pjesën e mbetur ta paguajnë me çmim tregu.
SITUATA
Nga të dhënat e para të Agjencisë së Kadastrës, mendohet se janë 40 deri në 60 mijë objekte të ndërtuara para vitit 1991, por kjo shifër nuk është përfundimtare. Do të jenë verifikimet në terren, ato që do të nxjerrin në pah situatën faktike.