Tre kryebashkiakët që ranë në “rrjetën” e dekriminalizimit
Partia Demokratike këmbëngul në emra të tjerë me probleme me drejtësinë
Kryebashkiaku i Vaut të Dejës, Mark Babani, është i treti nga drejtuesit e rinj socialistë të bashkive të dalë nga zgjedhjet e 30 qershorit, i cili ka rënë në “rrjetën” e Partisë Demokratike si i prekur nga ligji i dekriminalizimit. Sekretari i përgjithshëm në PD, Gazment Bardhi, u shpreh dje se në ditët në vijim do të dalin edhe emra të tjerë që preken nga ligji i dekriminalizimit. “Zotëria ( Mark Babani) nuk është i fundit, kemi raste të tjera në verifikim. Kemi mbledhur dhe mbledhim informacion çdo ditë për kandidatët e PS- së në bashkitë e tjera dhe bëjmë publik atë që është e verifikuar. Nuk është një i katërt, janë më shumë se një i katërt. Ka indicie të forta për disa kandidatë. Jemi në pritje të informacioneve”, tha Bardhi. Akuzat e ashpra të opozitës ndaj Valdrin Pjetrit, kryebashkiakut të ri të PS- së në Shkodër, se kishte fshehur një dënim dhe dëbim të tij nga Italia, e detyruan Pjetrin që të jepte dorëheqjen nga marrja e detyrës së re, duke e bërë të paqartë zgjidhjen e ngërçit në këtë bashki. Valdrin Pjetri pranoi se diçka kishte ndodhur në Itali, por kurrsesi nuk e gjente veten fajtor, pasi thotë se ai nuk ka shitur apo trafikuar drogë në moshën 20- vjeçare. “Një ngjarje krejt banale e ndodhur në mes të shokëve të mi bashkëstudentë, në të cilën unë nuk kam asnjë faj e përgjegjësi e nuk i kisha kushtuar rëndësi, 17 vjet më parë, në moshën 20- vjeçare, u nxor nga konteksti dhe rreth saj u ngritën akuza e linçime përtej çdo skrupulli moral e njerëzor”, u shpreh Pjetri ditën që dha dorëheqjen. Por demokratët akuzuan dhe kreun e ri të Bashkisë së Vorës, Agim Kajmakun, se kishte fshehur në formularin e dekriminalizimit një dënim dhe dëbim nga Greqia. Edhe kësaj radhe, PD- ja i kërkoi Prokurorisë së Përgjithshme nisjen e verifikimeve ndaj kryebashkiakut të Vorës. “Ai dyshohet se ka qenë i arrestuar/ ndaluar në Greqi dhe më pas, ndaj tij është marrë masa e dënimit dhe dëbimit nga autoritetet përgjegjëse greke”, shkruhet në kërkesën e sekretarit të përgjithshëm të PD- së. Një fakt, që nuk rezulton në formularin e plotësuar nga kryebashkiaku i Vorës, i cili megjithatë ka pranuar më herët se ka ndryshuar emrin në Jorgo Toto, duke shpjeguar se këtë e ka bërë në mesin e viteve ’ 90 për të përfituar vizë udhëtimi në shtetin grek.