PD kërkon verifikimin e Mark Babanit: Ka qenë i dënuar në Itali e Maqedoni
Gazment Bardhi: Ekzistojnë dyshime të arsyeshme se ky shtetas, në mënyrë ilegale ka mbajtur edhe disa identitete të tjera
Partia Demokratike i kërkon Prokurorisë verifikimin e kryetarit të Bashkisë së Vaut të Dejës, Mark Babanit, për fshehje të dënimeve në Itali dhe Maqedoninë e Veriut.
Sekretari i përgjithshëm i PD- së, Gazment Bardhi, përmes një shkrese dërguar Prokurorisë së Përgjithshme, Sektorit të Dekriminalizimit, kërkon verifikim të të dhënave që Babani ka deklaruar në formularin e tij të dekriminalizimit. “Mark Babani dyshohet se ka qenë i arrestuar/ ndaluar në Itali gjatë periudhës 1994- 1999 dhe më pas, ndaj tij është marrë masa e dënimit dhe dëbimit nga autoritetet përgjegjëse italiane. Nga ana tjetër, të dhëna të bëra publike më parë tregojnë se ai ka qenë i arrestuar/ ndaluar dhe më pas dënuar edhe në Republikën e Maqedonisë së Veriut gjatë periudhës 20022003”, thuhet në shkresën e Partisë Demokratike, ku zbulohet edhe një detaj tjetër, që ngre dyshime të arsyeshme se Mark Babani i Bashkisë së Vaut të Dejës ka gënjyer në formularin e dekriminalizimit. “Në formularin e vetëdeklarimit, shtetasi Mark Babani ka deklaruar se ka jetuar për 5 vite në Itali. Nga verifikimi i të dhënave të sistemit TIMS rezulton se shtetasi Mark Babani, nga periudha 1994– 2005, nuk ka udhëtuar në asnjë rast të vetëm në drejtim të Italisë me identitetin e tij real, çka përbën një indicie për saktësinë e të dhënave të bëra publike më parë”. Bazuar në formularin e dekriminalizimit të kryebashkiakut të Vaut të Dejës, sekretari i përgjithshëm i PD- së, Bardhi, shkruan se “pyetjeve nëse është i ndaluar apo arrestuar ndonjëherë nga organet ligjzbatuese për kryerjen e një vepre penale, nëse është dënuar ndonjëherë nga autoritetet gjyqësore të huaja apo nëse ndaj tij është marrë ndonjëherë masë dëbimi nga një shtet i huaj, rezulton se Mark Babani u është përgjigjur ‘ Jo’”. Sipas tij, bazuar në ligjin për dekrimilanizimin, pasqyrimi i të dhënave të pasakta dhe të pavërteta në formularin e dekriminalizimit përbën vepër penale dhe sjell shkualifikimin e menjëhershëm të subjektit nga kandidimi apo ushtrimi i mëtejshëm i funksionit publik.
Sipas Partisë Demokratike, Babani ka përdorur tri identitete të tjera përmes të cilave ka shmangur ndalimin e tij në kufijtë europianë për shkak të dënimeve të mëparshme. “Partia Demokratike vë në dijeni Prokurorinë edhe për të paktën 3 identitete të tjera që Mark Babani, i emëruar nga Edi Rama në Bashkinë e Vaut të Dejës, nuk i ka deklaruar në formular. Në formularin e vetëdeklarimit, shtetasi Mark Babani ka deklaruar se ka mbajtur identitetin e ndryshuar Mark Ndoc Babaj, i datëlindjes 24.12.1966. Ekzistojnë dyshime të arsyeshme, sipas indicieve të bëra publike më parë, se ky shtetas, gjithashtu në mënyrë ilegale ka mbajtur edhe disa identitete të tjera, të padeklaruara në formularin e dekriminalizimit, si më poshtë: Mark Ndoc Babani, i datëlindjes 24.12.1965; Marq Saimir Babaj, i datëlindjes 11.06.1967 dhe Ylli Saimir Babaj, i datëlindjes 02.11.1968”, thuhet në kërkesën e sekretarit të përgjithshëm të PD- së, Gazment Bardhi, drejtuar Prokurorisë së Përgjithshme. Kërkesa e Partisë Demokratike i është dërguar për dijeni edhe ambasadës së Shteteve të Bashkuara të Amerikës, delegacionit të Bashkimit Europian në Tiranë, ambasadave të vendeve të BE- së, por dhe zyrës së OSBE- së dhe Këshillit të Europës në Tiranë. Në kërkesën për verifikimin e Mark Babanit nga Prokuroria, e shoqëruar me firmat e 500 qytetarëve, Partia Demokratike vë në dukje se pret një verifikim dhe reagim të shpejtë nga Prokuroria, për shkak të interesit të lartë që çështja paraqet.