Pronari i jahtit luksoz: Biseda e fundit me kapitenin
Autoritetet e Malit të Zi kthejnë përgjigje për letërporosinë
Pronari i jahtit luksoz, që gjendet në Portin e Shëngjinit prej 5 ditësh, është marrë në pyetje lidhur me rrethanat misterioze të zhdukjes së kapitenit, Sevgin Yavuz.
Nedin Akyuz ka deklaruar itinerarin që do të ndiqte jahti me emrin “Atik Bey” dhe bisedën e fundit që ka pasur me kapitenin 31- vjeçar. Gjatë marrjes në pyetje nga Policia në Lezhë, Akyuz ka qenë i shoqëruar nga sekretari i përgjithshëm i ambasadës turke në Shqipëri. Sipas dëshmisë së Nedim Akyuz, kapiteni në momentin e zhdukjes ka qenë duke udhëtuar drejt Korfuzit, pasi më parë ishte furnizuar me karburant në Budva të Malit të Zi. Ai u ka bërë kërkesë autoriteteve për marrjen e jahtit, i cili tashmë qëndron i bllokuar si provë materiale për një periudhë të pacaktuar. “Fillimisht ka shkuar në Korfuz, ku ka lënë në port familjen e vëllait tim, që po kalon pushimet në Greqi dhe më pas kapiteni i jahtit ka udhëtuar i vetëm në drejtim të Malit të Zi, ku në Budva është furnizuar me karburant dhe më pas ka marrë sërish rrugën e kthimit drejt Korfuzit. Hera e fundit që kam biseduar me kapitenin e jahtit ka qenë data 6 shtator, ku Sevgin Yavuz më ka pohuar se ishte duke lundruar në ujërat shqiptare, pranë zonës së Durrësit, por në det kishte jashtëzakonisht shumë erë dhe lundrimi po bëhej i vështirë”, ka thënë në dëshminë e tij biznesmeni turk, duke bërë që të lindin dyshimet se 31- vjeçari mund të ketë rënë në det për shkak të dallgëve apo të ndonjë avarie gjatë rrugës. Kjo mbetet në kuadër të dyshimeve, pasi pronari i jahtit është shprehur se nuk di asgjë mbi rrethanat e zhdukjes së kapitenit. Nga ana tjetër, hetuesit kanë gjetur në bordin e jahtit me vlerë 2 milionë euro, pajisje peshkimi dhe incidenti mund të ketë ndodhur edhe ndërsa kapiteni ka qenë duke peshkuar, pasi motorët e mjetit lundrues kanë qenë të fikur.
Jahti “Atik Bey” u pikas nga një peshkarexhë rreth 11 milje larg Shëngjinit. Ndërkohë, autoritetet malazeze u kanë kthyer përgjigje zyrtare autoriteteve të vendit tonë, pas kërkesës që këta të fundit u bënë për itinerarin e jahtit luksoz në pronësi të një biznesmeni turk. Nëpërmjet letërporosisë, porti detar i Tivarit në Malin e Zi ka pohuar se shtetasi turk Sevgin Yavuz ishte regjistruar i vetëm në bordin e jahtit më datë 2 shtator. Ai ka lundruar në drejtim të ujërave neutrale dhe destinacioni ishte Korfuzi. Burime nga grupi hetimor saktësuan se mister mbetet edhe fakti që, lundrimi i këtij mjeti në afërsi të Shëngjinit nuk është diktuar nga radarët policorë, çka dyshohet se vetë shtetasi turk mund të ketë fikur pajisjen sinjalizuese. Për këtë gjë tashmë janë nisur edhe verifikimet nga Prokuroria e Lezhës, për të parë nëse është ndjekur praktika standard e institucioneve përkatëse, apo pajisja sinjalizuese është fikur me tendencë nga turku Sevgin Yavuz. Ndërkohë, pronari i jahtit, Nedim Akyuz, do të qëndrojë në Shqipëri edhe për disa ditë, ku pritet të merret në pyetje sërish nga grupi hetimor, ndërsa është në pritje edhe të tërheqjes së jahtit, i cili është në pronësi të tij dhe ka dorëzuar pranë autoriteteve shqiptare të gjithë dokumentacionin përkatës.