Trump shkarkon Bolton: S’jam dakord me propozimet e tij
Bolton ishte mes zërave që kundërshtuan pavarësinë e Kosovës
Presidenti i SHBA, Donald Trump, ka shkarkuar nga detyra këshilltarin e tij të Sigurisë Kombëtare, John Bolton, një lajm i befasishëm që ka sjellë reagime të ndryshme.
Trump njoftimin e bëri në “Twitter”, ku ka thënë se “E njoftova mbrëmë John Bolton se shërbimet e tij nuk nevojiten më në Shtëpinë e Bardhë. Nuk isha dakord me shumë propozime të tij, ashtu si edhe shumë të tjerë në administratë… Prandaj i kërkova John- it dorëheqjen, të cilën e dha këtë mëngjes. E falënderoj shumë atë për këtë shërbim”, shkroi Trump. Mes shumë çështjeve që Presidenti dhe këshilltari i tij nuk pajtoheshin, përplasja e fundit ishte mbi Afganistanin. Trump donte që të ftonte përfaqësuesin e talebanëve në Camp David, një lëvizje e kundërshtuar me forcë nga Bolton, aq sa i kushtoi pozicionin në Shtëpinë e Bardhë. VERSIONI I BOLTON Bolton u kundërpërgjigj të martën, duke shkruar pak momente pas njoftimit të Presidentit, se ai e ofroi vetë dorëheqjen e tij të hënën në mbrëmje dhe ajo nuk u pranua menjëherë nga Trump. “Unë ofrova të dorëhiqem mbrëmë dhe Presidenti Trump tha: “Le të flasim për këtë nesër”, ka shkruar Bolton. “Nuk kishte asnjë kërkesë për dorëheqje”, tha ai për “Fox news”, duke dhënë një version tjetër nga ai i Presidentit. Bolton ka punuar në administratat e ish- presidentëve Ronald Reagan, George H. W. Bush dhe George W. Bush, si dhe ka shërbyer si avokat i Bush gjatë rinumërimit në Florida, në vitin 2000. Ai shërbeu gjithashtu si një përfaqësues i përhershëm i SHBA në Kombet e Bashkuara në vitet 2005- 2006, dhe si një Sekretar i Shtetit për kontrollin e armëve e sigurinë ndërkombëtare në vitet 2001- 2005. POMPEO DHE MNUCHIN
Para se Presidenti të jepte lajmin mëngjesin e së martës, Bolton duhej të mbante një takim të sigurisë kombëtare me Sekretarin e Shtetit, Mike Pompeo dhe atë të Thesarit, Steven Mnuchin. Pompeo dhe Mnuchin mbrojtën Presidentin. “Presidenti ka të drejtën të mbajë stafin që dëshiron”, tha Pompeo. Sa për befasinë e largimit të Bolton, Pompeo u shpreh: “Nuk habitem kurrë”. Ndërkohë, Mnuchin theksoi se megjithëse Bolton iku, administrata ka për qëllim të vazhdojë presionin maksimal ndaj Iranit. Por, pohoi se Trump po përgatitet të takojë këtë muaj Presidentin iranian, Hassan Rouhani, në Asamblenë e Përgjithshme të OKBsë, pa parakushte. BOLTON “KUNDËR
KOSOVËS” Bolton ka qenë një kundërshtar i njohjes së pavarësisë së Kosovës nga SHBA, gjatë kohës që ishte ambasador në OKB, por edhe kur ka shërbyer si këshilltar. Në një opinion të shkruar në janar të vitit 2008, në bashkëpunim me Lawrence Eagleburger dhe Peter W. Rodman, ai shprehej kundër shpalljes së pavarësisë së Kosovës. Tre opinionistët i bënin thirrje Presidentit të atëhershëm, George W. Bush, që të rishqyrtonte politikën e Amerikës në Kosovë; të merrte parasysh shqetësimet e Serbisë mbi atë çështje; të mos krijonte përplasje me Rusinë dhe të ndalonte njohjen e pavarësisë së Kosovës derisa rishqyrtimi të kishte përfunduar. Në opinion, mes të tjerash ai ka shkruar se “Kosova nuk kishte aftësitë ekonomike e administrative për të ekzistuar si shtet normal; dhe njohja e njëanshme e pavarësisë do të ishte kënaqje e kërcënimeve për dhunë nga ana e shqiptarëve”.
Edhe gjatë qëndrimit të tij si Këshilltar Sigurie i Trump, Bolton është shfaqur relativisht në krah të Serbisë. Ai ka pasur disa takime me zyrtarë të lartë të Serbisë, mes tyre takimi me ministrin e Jashtëm serb, Ivica Daçiç, i cili pas takimit tha se “Serbia nuk është kuptuar ndonjëherë më mirë në Uashington”. Bolton ka udhëtuar në Shqipëri si përkrahës i grupit të muxhahedinëve, grup qëndrese kundër regjimit në Iran, para se të emërohej Këshilltar Sigurie i Trump.