VENDIMI ME EMRAT
Ndahen 1.5 milionë USD, pronarët që përfitojnë
Agjencia e Trajtimit të Pronave hapi dje aplikimin për ndarjen e fondit 1.5 milionë USD të kompensimit. Gazeta zbardh listën zyrtare të familjeve që mund të përfitojnë paratë
Pas hapjes së aplikimeve dhe dorëzimit të dokumenteve nga pronarët, ATP ka shpallur edhe listën e përfituesve. Janë 82 familje të shpronësuara për efekt të procesit legalizues që marrin paratë e kompensimit. PËRFITUESIT
Agjencia e Pronave ka marrë dje vendimin "Për shpërndarjen e fondit të kompensimit në vlerë për pronarët e pasurive të paluajtshme, pronë private që preken nga ndërtimet pa leje". Gjithsej janë 82 familje, të cilat sipas ligjit në fuqi kanë të drejtë që në këtë fazë të parë të marrin 70 për qind të vlerës që ka prona sot në treg. "Agjencia e Trajtimit të Pronave njofton se, më datë 10.09.2019, ka përfunduar procesin e shqyrtimit për 82 kërkesa të paraqitura nga subjektet përfituese, pronarë të pasurive të paluajtshme, pronë private, të prekura nga ndërtimet informale, që përfitojnë deri më tani kompensimin/ shpërblimin në vlerë, në masën 70% të shumës së përgjithshme në të holla, të miratuar me Vendimet përkatëse të Këshillit të Ministrave", thuhet në njoftimin e Agjencisë.
FONDI
Fondi i ndarë për këto familje kap vlerën e rreth 1,5 milionë dollarëve. Pagesat, sipas Agjencisë, do të jenë gati në ditët në vijim. "Fondi financiar që shpërndahet nga ATP për këto 82 kërkesa, është në vlerën 155 944 911,22 lekë. Agjencia e Trajtimit të Pronave njofton subjektet e interesuara se vlerat përkatëse për secilin përfitues do të jenë disponibël në llogaritë e tyre në bankat e nivelit të dytë pas përfundimit të procedurave të transfertave bankare në ditët në vazhdim". Nga të dhënat e Ministrisë së Financave, rezulton se deri në vitin 2021, për skemën e kompensimit të pronarëve do të shkojnë rreth 10,8 miliardë lekë, e ndarë kjo në 2 këste. Kështu, për vitin që vjen, fondi në adresë të pronarëve do të jetë 5,4 miliardë lekë. Edhe në vitin 2021 do të disbursohet e njëjta shumë. Këtu përfshihet edhe fondi për kompensimin e familjeve të shpronësuara për efekt të procesit legalizues. Pagesat për këtë kategori kanë vazhduar përgjatë gjithë kësaj periudhe, duke mos u kushtëzuar nga ndryshimet që ka pësuar ligji i pronave. Por, pavarësisht kësaj, ka një numër të konsiderueshëm familjesh të cilat edhe pse janë përfituese, nuk e kanë marrë kompensimin, kjo edhe për shkak të burokracirave që kanë shoqëruar këtë proces. Ndonëse u tha që do të rishikohej lista me dokumentet e kërkuara, ende nuk ka asgjë konkrete në këtë drejtim.