Negociatat, Rama takon Merkelin: Mora vlerësime shumë inkurajuese pozitive
Zyra e Kancelares Merkel: Gjermania ka një interes të fortë për të kontribuar në kushte të qëndrueshme, e vendos Bundestagu
Kryeministri Rama mori dje nga Kancelarja gjermane Angela Merkel vlerësime pozitive për fazën në të cilën ndodhet vendi për hapjen e negociatave me Bashkimin Europian.
Pas takimit me Kancelaren gjermane, kreu i qeverisë, i cili zhvilloi takime në Bundestagun gjerman, tha se ka marrë mbështetje nga Merkel. Vetë Kancelarja ka postuar në llogarinë e saj në “Twitter” një foto nga takimi me Ramën, duke komentuar librin e dhuruar nga Kryeministri i Shqipërisë. “E kemi filluar ditën qysh herët sot, me këto takime dhe do të vazhdoj të takoj edhe grupe të vogla, apo individë të rëndësishëm në Bundestagun gjerman. Por, sigurisht, takimi me Kancelaren ishte ai që kishte rëndësi të veçantë dhe pa dashur të shkoj përtej asaj që mund të them për momentin, edhe në respekt të Kancelares dhe le të themi të konfidencialitetit formal të takimit, – Kancelarja pati vlerësime shumë inkurajuese pozitive dhe ajo që është më e rëndësishme, një predispozitë shumë pozitive për ta çuar përpara këtë proces dhe për të arritur në një përfundim pozitiv, që do të thotë një mbështetje e Gjermanisë për atë çka të gjithë dëshirojmë”, u shpreh Rama. Në një njoftim për takimin me Kryeministrin Rama, zyra e Kancelares thekson se Gjermania ka interes për të garantuar stabilitetin demokratik dhe kushtetues të Shqipërisë. “Gjermania ka një interes të fortë për të kontribuar në kushte të qëndrueshme, demokratike dhe kushtetuese në Shqipëri duke mbështetur procesin e transformimit të saj. Më parë, Rama ishte në prill 2018 mysafir në Kancelarinë Federale për të diskutuar me Kancelaren Merkel, ndër të tjera, gjendjen e afrimit të BE në Shqipëri. Gjithashtu, gjatë një takimi të Ballkanit Perëndimor në prill 2019 në Kancelarinë Federale u zhvillua një diskutim dypalësh midis dy krerëve të qeverive”, theksohet ndër të tjera në njoftimin e shpërndarë nga zyra e shtypit të Kancelares Angela Merkel.
KUSHTET Por Kryeministri nuk e fshehu qëndrimin gjerman, i cili parashikon disa kushte deri në dhënien e një Po- je për Shqipërinë për hapjen e negociatave. “Sigurisht që nuk bëhet fjalë për një dhuratë, bëhet fjalë për të marrë atë që na takon. Sigurisht, nuk bëhet fjalë për ta mbyllur procesin, por bëhet fjalë për të hyrë në një fazë të re, me kushte në çdo hap, sepse i gjithë procesi është i kushtëzuar, duhet të përmbushësh gjithmonë disa kushte, për të shkuar një hap më tutje, pastaj disa kushte të tjera, pastaj disa të tjera dhe llogaritë tregojnë se të gjitha vendet që kanë kaluar në këtë proces, i cili është bërë gjithmonë e më i vështirë, për shkak se Europa, BE, është bërë gjithmonë e më e ngurtë dhe ka hyrë në vështirësi të reja me vetveten, iu është dashur të përmbushin qindra e qindra kushte”, u shpreh Rama. Sipas tij, edhe pse një pjesë e vështirësive për hapjen e negociatave ka ardhur nga politika shqiptare, Shqipëria pritet të hyjë në një fazë të re të integrimit. “Megjithatë, ky është një proces. Gjermania ka një procedurë të veçantë, sepse kalon nëpërmjet Bundestagut, nëpërmjet diskutimeve në grupe. Grupet janë grupe demokratike, kanë ide të ndryshme, kanë qasje të ndryshme, kështu që me shumë durim, ne do të vazhdojmë kontaktet dhe kjo është faza kur do të bëjmë çmos që, pavarësisht gjithë pengesave që ia kemi krijuar vetes në gjysmën e parë të këtij viti, sidomos, t’ia dalim që të hyjmë në një fazë të re, krejt tjetër, të rrugës sonë europiane”, tha Rama nga Berlini. “Ne po punojmë intensivisht për aq sa mund të bëjmë. Jemi të vetëdijshëm se vendimi gjithsesi ka të bëjë më pak me ne dhe me çfarë bëjmë ne dhe më shumë me vendet dhe me çfarë ato kërkojnë në radhë të parë nga BE, që, siç e ka thënë Presidenti francez, nuk funksionon me 28, si mund të funksionojë me më shumë, etj.... dhe sigurisht në raport me opinionet e tyre publike që është një problem i mirëkuptueshëm më vete. Patjetër që një pozicion pozitiv i Gjermanisë do të thotë shumë. Gjermania është një zë, le të themi, jo si të gjithë të tjerët në familjen e Europës së bashkuar dhe ne do të bëjmë çmos që ky zë të jetë në favor të Shqipërisë”, u shpreh Rama pas takimit me Kancelaren gjermane, Merkel.