Bundestagu, debatet mes të majtëve dhe të djathtëve

PSD dhe të gjelbrit mbështesin hapjen e negociatave

“Deutsche Welles” shkruante dje se për socialdemokratët dhe të gjelbrit, të cilët e kanë shprehur qysh herët qëndrimin e tyre pro çeljes së negociatave, audienca e Edi Ramës në Bundestag nuk solli ndonjë ndryshim në opinion. Deputeti socialdemokrat, Christian Petry, i tha “Deutsche Welles”, se partia e tij është duke finalizuar kompromisin me kristiandemokratët dhe kristiansocialët. Sipas Petryt, “po shtohen gjasat që në datat 26 ose 27 shtator të votojmë për një Po, me kushte”. Shefi i komisionit parlamentar për çështje të BEsë, Günter Krichbaum, CDU, një nga politikanët më skeptikë deri tani për çeljen e negociatave me Shqipërinë, nuk u prononcua pas dëgjimit të Ramës në Bundestag. Por një ditë më parë, në një intervistë me DW, ai kishte deklaruar se nuk e përjashton mundësinë që Maqedonia e Veriut dhe Shqipëria të ecin në rrugë të ndryshme drejt BE- së. “Siç thashë, në Bundestagun gjerman jemi duke u këshilluar edhe për Shqipërinë, dhe sa i përket pyetjes suaj për ndarje, mund të them se që prej raundit të fundit të zgjerimit të BE, me 10 plus 2 shtete, më 2004 dhe 2007 është parë se është më mirë që vendet të vlerësohen sipas përparimeve që bëjnë vetë, me të ashtuquajturën “principle of own merit”. Prandaj, vendet duhen gjykuar për përpjekjet që bëjnë. Për mua është e qartë se mund të bëhet shkëputja e dy vendeve, e megjithatë në fund mund të ndodhë që bisedimet të fillojnë në të njëjtën kohë për të dyja vendet. Nuk po flasim për fillimin e bisedimeve për kapitujt e pranimit, se ky është hapi i dytë. Ky principle of own merit është një princip i BE dhe secili vend vlerësohet për sukseset e veta”, është shprehur Krichbaum.