Gjyqtari i Administratives konfirmohet për herë të dytë

Komisioneri ankimoi vendimin pas rekomandimit të ONM

Kolegji i Posaçëm i Apelimit vendosi të lërë në fuqi vendimin e KPK- së dhe të konfirmojë për të dytën herë gjyqtarin e Gjykatës Administrative, Gentian Medja. a

Problemet me aftësitë profesionale çuan në apelimin e vendimit të Shkallës së Parë nga ana e Komisionerit Publik, i cili mori edhe një rekomandim nga Operacioni Ndërkombëtar i Monitorimit për këtë rast. "Kolegji i Posaçëm i Apelimit, pasi mori në shqyrtim metodologjinë e propozuar nga Komisioneri Publik, shqyrtoi vendimin e KPK, mbështetur në kriteret dhe treguesit që janë përdorur në këtë metodologji, arriti në përfundimin se vendimi i KPK është i drejtë dhe duhet lënë në fuqi. Për këto arsye, trupi gjykues i KPA, me shumicë votash vendosi lënien në fuqi të vendimit të KPK për Medjan", tha kryesuesja e trupit gjykues, Natasha Mulaj. Një seancë më parë, Komisioneri Publik kishte hequr dorë nga ankimi i bërë konfirmimit në detyrë të Medjes dhe tha se duke marrë në konsideratë provat e paraqitura, përfshi qëndrimin e kryetarit të Gjykatës Administrative mbi ngarkesën dhe etikën në punë, atë të Këshillit të Lartë Gjyqësor dhe atë të Shkollës së Magjistraturës, rezultonte se gjyqtari Gentian Medja ishte i aftë profesionalisht. E megjithatë, ligji për procesin e rivlerësimit kalimtar e parashikon shkarkimin vetëm në raste kur shkeljet janë të rënda dhe subjekti nuk mund të bëhet i aftë për 1 vit në Shkollën e Magjistraturës. Operacioni Ndërkombëtar i Monitorimit kishte rekomanduar ankimimin e vendimit të konfirmimit të Medjes, i cili nga hetimi rezultoi se ishte një nga gjyqtarët më të "varfër" të sistemit. "Në datë 9 gusht 2018, Operacioni Ndërkombëtar i Monitorimit u ka paraqitur komisionerëve publikë rekomandimin për ta ankimuar në Kolegjin e Posaçëm të Apelimit vendimin e KPK për konfirmimin në detyrë të gjyqtarit të Gjykatës Administrative, Shkalla e Parë Tiranë, Gentian Medja", njoftoi Komisioneri Publik. Ndërkohë, nga vlerësimi në Shkallë të Parë, rezultoi se në kriterin e pasurisë dhe atë të figurës, gjyqtari rezulton i pastër. Në bazë të vendimit të zbardhur të KPKsë, disa prej problemeve të konstatuara në lidhje me aftësitë profesionale, nuk janë të tilla sa të cenojnë integritetin e gjyqtarit. Në përfundim, anëtarët e trupës gjykuese për rastin, janë shprehur se subjekti ka arritur nivel të besueshëm në vlerësimin e pasurisë, ka arritur nivel të besueshëm në kontrollin e figurës, sa i takon aftësive profesionale, ka arritur nivel kualifikues në vlerësimin e aftësive profesionale.