ZBARDHEN VENDIMET Ushtarakët e minatorët, ndryshimet për pensionet
Zbardhen ndryshimet në skemën e pensioneve. Qeveria parashikon lehtësi për minatorët, ushtarakët dhe vitet e punës. Kategoritë që përfitojnë
Prej këtij muaji, do të nisë të aplikohet edhe shtesa në masën e pensionit për minatorët, naftëtarët dhe metalurgët.
Këshilli administrativ i ISSH- së ka miratuar në mbledhjen e fundit edhe projektvendimin në të cilin përcaktohen procedurat për llogaritjen e shtesës, dokumentet që duhet të dorëzohen, si edhe kategoritë që do të përfitojnë. Veç këtij drafti, për miratim kanë kaluar edhe 4 projektvendime të tjera që kanë të bëjnë me rillogaritjen e pensioneve të ish- ushtarakëve, lehtësimin e procedurave për njohjen e viteve të punës para ' 93, kontributet në zonat rurale dhe pensionet e parakohshme. Gazeta ka siguruar informacion të plotë për secilën prej tyre.
SHTESA Rritja e pensioneve për minatorët, naftëtarët dhe metalurgët varion nga 9 deri në 20 për qind. Për të përfituar, pensionistët duhet të dorëzojnë vetëm kërkesën dhe një fotokopje të kartës së identitetit të nënshkruar prej tyre. Kjo pasi dosja e plotë është në arkivin e ISSH, ndaj edhe nuk është i nevojshëm asnjë dokument tjetër shtesë. Ndërkohë, ndryshojnë kushtet për ata të cilët dalin rishtazi në pension, pra ata që mbushin moshën dhe ata që janë mbi 48 vjeç e që zgjedhin të dalin në pension të parakohshëm, të cilët krahas kërkesës për caktim pensioni, duhet të dorëzojnë fotokopje të dokumentit të identifikimit, vërtetim të zyrës së Gjendjes Civile, në rast të ndryshimit të gjeneraliteteve; librezë pune e plotësuar në të gjitha rubrikat, sipas llojit të punës; vërtetim për bazën e vlerësuar për periudhat e punësimit nga data 1.1.1994, deri në datën e ndërprerjes së marrëdhënieve financiare nga puna ose vetëpunësimi; vërtetim i posaçëm i konfirmimit të llojit të punës në profesionet e vështira; vërtetim për kryerjen e shërbimit të detyrueshëm ushtarak ( për burrat), si edhe çdo dokumentacion tjetër i lëshuar nga organizma shtetërorë, që konfirmon llojin dhe periudhën e punës. Janë më shumë se 23 mijë pensionistë që përfitojnë nga shtesa, e cila varion nga 9 deri në 20 për qind mbi masën e pensionit. Ligji përcakton rritje me 1 për qind për çdo vit pune në nëntokë për minatorët. Ndërsa për metalurgët dhe naftëtarët, shtesa është me 0.6 për qind për çdo vit kontributiv. Kjo do të thotë se sa më shumë vite pune, aq më i lartë edhe përfitimi. ISH- USHTARAKËT Rritje është parashikuar edhe për ish- ushtarakët. Drafti i ri, që pritet të kalojë për miratim brenda këtij viti edhe në Qeveri, ka si qëllim ngushtimin e diferencave të krijuara ndër vite duke sjellë rritje të pensioneve suplementare. Konkretisht, një ushtaraku që i është caktuar një pension pleqërie 24 000 lekë, në të njëjtën kohë ka marrë edhe pension suplementar, që në asnjë rast nuk ka qenë më i lartë se 12 000 lekë. Kjo për shkak të pragut të përcaktuar në ligj, që nuk lejon ushtarakët, edhe kur këta të fundit i përmbushin kushtet, të mos marrin më shumë se gjysma e pensionit të pleqërisë që iu është caktuar. Por, me kalimin e viteve, pensioni ka pësuar rritje, ndërkohë që nuk ka ndodhur e njëjta politikë me përfitimin suplementar. Do të jetë pikërisht kjo kategori që do të përfitojë edhe nga rritja. Duke iu referuar shembullit të mësipërm, për të njëjtin person, pensioni i pleqërisë mund të ketë shkuar 30 000 lekë. Në këto kushte, edhe pensioni suplementar do të bëhet sa gjysma e pensionit të pleqërisë, pra 15 000 lekë në muaj, duke u rritur me 3 000 lekë.