Lehtësirat për njohjen e viteve të punës para vitit 1993
Lehtësira do të ketë edhe për vitet e punës para vitit 1993, të cilat do të njihen pa qenë e nevojshme që të shkohet në Gjykatë. Në këtë mënyrë, me anë të vendimit të ri, "Për disa çështje të dokumentimit të periudhave të sigurimit dhe vjetërsisë në punë për efekt pensioni", zgjidhen disa problematika të konstatuara, në lidhje me mungesën e dokumentacionit arkivor për verifikueshmërinë e periudhave të vjetërsisë në punë, me qëllim saktësimin dhe vlefshmërinë përfundimtare të periudhave të sigurimit për njohje për përfitime. Është parashikuar që në mënyrë administrative dhe pa cenuar kompetencat e gjykatave, përkundrazi duke sjellë fakte dhe dokumentacionin që administron kërkuesi, t'i bëjë organet e sigurimeve shoqërore vendimmarrës për periudhat e vjetërsisë në punë para 01.01.1994, duke qenë më bashkëpunues me drejtësinë, në dhënien e të drejtave qytetarëve dhe në uljen e rasteve për ndjekje të procedurave gjyqësore. Lehtësira do të ketë edhe për të vetëpunësuarit në bujqësi, pasi nuk do penalizohen prej vendbanimit. Kështu, projektvendimi i ri synon të zgjidhë problemet e hasura gjatë aplikimit të skemës së pensioneve për personat e vetëpunësuar në bujqësi, për shkak se në disa raste, periudha e mbuluar me kontribute nga fermerët nuk përputhet me njësinë administrative ku kanë tokën, si dhe me vendbanimin, sipas regjistrit të gjendjes civile. Pagesat e kontributeve, sidomos në rastin e faljeve të kamatëvonesave, duke mos respektuar kushtet e përcaktuara me VKM, kanë sjellë si pasojë mosnjohjen e periudhave të sigurimit, për disa kategori fermerësh, konkretisht ata që kanë qenë me vendqëndrim në të njëjtin rreth ku kanë ushtruar aktivitetin bujqësor dhe/ ose blegtoral, si dhe kanë tokën, por kanë pasur vendbanimin, sipas regjistrit të gjendjes civile, në një rreth tjetër.