Korrupsioni në administratë, në hetim socialistë dhe demokratë
Qytetarë të shumtë kanë denoncuar "gjobat" që dy përgjegjësit për legalizimet u kanë vënë për shtëpitë e lokalet që kishin pa leje
Gjashtë ish- zyrtarë të ALUIZNI- t në Dibër dhe ish- punonjës të Bashkisë Dibër, që kanë drejtuar menaxhimin e llixhave, merren në hetim për abuzim me detyrën dhe korrupsion.
Aktualisht ish- zyrtarët janë në hetim në gjendje të lirë, ndërsa pritet arrestimi i tyre nëse do të faktohen shkeljet e dyshuara. Në bashkëpunim me njëri- tjetrin, dyshohet se ata kanë abuzuar me fondet, taksat, shpërblimet etj. Mësohet se ish- drejtuesit e llixhave kanë qenë persona të emëruar nga Partia Demokratike dhe ajo Socialiste. Ishdrejtorët kanë bashkëpunuar me ish- përgjegjësit e financës për të abuzuar me fondet e Qendrës Balneare Dibër. Ndërkohë, më e rëndë paraqitet situata e abuzimeve në degën e ALUIZNI- t në Dibër.
ALUIZNI Ish- drejtues të ALUIZNI- t akuzohen për korrupsion pasi u kanë vendosur qytetarëve "gjoba" për t'u legalizuar pronën. Hetimet ndaj tyre kanë nisur për shkak të një numri të lartë denoncimesh të bërë nga qytetarë të ndryshëm. Bëhet fjalë për Nexhat Kaziu, 56 vjeç, banues në Tiranë, ish- drejtor i Agjencisë së Legalizimit, Urbanizimit dhe Integrimit të Zonave Ndërtimeve Informale, në Drejtorinë Rajonale Dibër. Kaziu ishte emëruar në këtë post para vitit 2017 dhe dyshohet se në bashkëpunim me ish- përgjegjësin e financës kanë shpërdoruar detyrën. E njëjta akuzë është bërë ndaj Edmond Maho, 37 vjeç, banues në Dibër, ishpërgjegjësi i sektorit ALUIZNI- t, në Drejtorinë Rajonale Dibër. Të shumta kanë qenë akuzat e qytetarëve në portale dhe në organet e drejtësisë për Nexhat Kaziun dhe Edmond Mahon. Ata janë hetuar prej muajsh për abuzimet e kryera në lidhje me legalizimet e lokaleve e shtëpive të banimit. Burime të rezervuara bëjnë me dije se Maho e Kaziu akuzohen edhe për mitmarrje dhe "gjoba" ndaj qytetarëve të Dibrës, Matit e Bulqizës. Disa herë, banorët e këtij rajoni janë ankuar pranë drejtuesve të PS- së në Qarkun e Dibrës, duke kërkuar zgjidhjen e shqetësimeve dhe shkarkimin e Nexhat Kaziut, duke e akuzuar atë se nuk ua zgjidhte ato pa pagesë.
"Nga Specialistët e Seksionit për Hetimin e Krimit Ekonomik e Financiar në Drejtorinë Vendore të Policisë Dibër, në kuadër të masave të marra kundër informalitetit, kanë finalizuar një tjetër operacion policor ku si rezultat janë proceduar penalisht shtetasit: N. K, 56 vjeç, banues në Tiranë, ish- drejtor i Agjencisë së Legalizimit, Urbanizimit dhe Integrimit të Zonave / Ndërtimeve Informale, në Drejtorinë Rajonale Dibër. E. M, 37 vjeç, banues në Dibër, ish- përgjegjësi i sektorit të ALUIZNI- t, në Drejtorinë Rajonale Dibër. Nga kryerja e veprimeve hetimore të deritanishme ka rezultuar se këta shtetas, duke qenë të emëruar në detyra drejtuese pranë kësaj drejtorie, dyshohet se me veprimet e tyre në kundërshtim me ligjin kanë shpërdoruar detyrën, duke u sjellë përfitime të padrejta personave të tjerë, si dhe kanë dëmtuar interesat e ligjshme të shtetit në mbrojtjen dhe administrimin e territorit", bëhet e ditur zyrtarisht nga Policia.
BASHKIA Ndërkohë, në kuadër të masave kundër informalitetit, janë vënë në hetim dhe katër ish- drejtues të Qendrës Balneare në Dibër. Bëhet fjalë për Islam Qoku, 54 vjeç, ishdrejtor i ndërmarrjes, i emëruar në këtë post para vitit 2015, Ismet Voka, 52 vjeç, ish- përgjegjës i zyrës së financës, i emëruar në këtë detyrë në vitin 2013, Spartak Koltraga, 35 vjeç, ish- drejtor i ndërmarrjes, i emëruar në këtë post në vitin 2017, tashmë drejtor i Sigurimeve Shoqërore Dibër, E. M., 27 vjeç, ish- financier, emëruar në vitin 2017. Këta persona, duke qenë të emëruar në detyra të ndryshme pranë Qendrës Balneare Dibër, dyshohet se me veprimet e tyre, në kundërshtim me ligjin, kanë sjellë si pasojë mosfunksionimin normal të aktivitetit ekonomik dhe administrativ të Qendrës Balneare Dibër, duke iu sjellë përfitime të padrejta personave të caktuar të administratës së ndërmarrjes në bonuse transporti, si dhe kanë shmangur nga taksimi mbi të ardhurat nga shpërblimet punonjësit e kësaj qendre, veprime të cilat kanë cenuar interesat e ligjshme, duke i shkaktuar një dëm të konsiderueshëm ekonomik kësaj ndërmarrjeje. Qendra Balneare Dibër ka qenë objekt i një auditimi të rreptë nga ana e Kontrollit të Lartë të Shtetit, por konkluzionet nuk janë bërë publike nga ish- drejtorët.