Lufta e Gërhotit, përplasje në ceremoninë përkujtimore
Dasho Aliko: Artur Roshi i paftuar, i nxiti Adriatik Alimadhi
Sharje, të bërtitura, akuza, konflikt verbal e fizik. Kjo situatë ka mbizotëruar gjatë ceremonisë përkujtimore të Luftës së Gërhotit në Gjirokastër ku prehen eshtrat e disa prej krerëve nacionalistë të ekzekutuar gjatë Luftës së Dytë Botërore.
Ceremonia u zhvillua në një klimë të tensionuar mes fjalëve fyese e britmave të disa prej pjesëmarrësve që u afruan në momentin kur organizatorë e të ftuar do të mbanin fjalët e rastit. Grupi i nacionalistëve protestues sulmuan verbalisht dhe akuzuan si tradhtar deputetin dhe kryetarin e Partisë Balli Kombëtar Demokrat, Artur Roshin, i cili ishte i pranishëm në ceremoninë e organizuar nga PDja. I pranishëm veç familjarëve ka qenë edhe ish- deputeti Enkelejd Alibeaj, ish- deputeti tjetër i PD- së, Luan Baçi, Kryetari i Shoqatës Antikomuniste, Nebil Çika, kryetari i PD- së Gjirokastër, Dasho Aliko, i cili është përpjekur ta qetësojë situatën disa herë, por pa rezultat. Situata u rëndua edhe më tej, teksa kryetari i shoqatës Antikomuniste, Nebil Çika, në fjalën e mbajtur, nuk i kurseu sulmet në adresë të të pranishmëve në ceremoni, duke e quajtur “provokim” kundërshtinë e grupimit nacionalist. Kreu i PD Gjirokastër, Dasho Aliko, tha se përplasja ndodhi për shkak të pranisë së kreut të Ballit Kombëtar Demokrat, që sipas Alikos kishte shkuar i paftuar. Ai ka identifikuar nacionalistët e irrituar si pjesë e grupimit nacionalist të udhëhequr nga Adriatik Alimadhi, kreu i Partisë Balli Kombëtar, aktualisht deputet i Parlamentit shqiptar. “Sot është 14 shtatori, 76- vjetori i të rënëve në luftën në Gërhot, që u vranë nga sistemi i kohës. Kur ishim gati duke filluar homazhet, erdhi dhe zoti Roshi, që ishte i paftuar, dhe u fut në turmë. Ne nuk mund të pengonim askënd. Një grup tjetër i vendosur nga Alimadhi erdhi dhe filluan të debatonin përse Roshi është këtu, duke u shprehur se ‘ ata janë tradhtarë’. Mendoj se ishte një luftë mes dy Partive të Ballit për zona influence. Ata nuk kishin asgjë me PD- në, madje na thanë përse ka ardhur Roshi këtu. Ata thanë se ju shkelët gjakun e të rënëve, sepse shkelët në një Parlament që drejtohet nga ata që i kanë vrarë”, tha Aliko. Arsyet e përplasjes në ceremoni, ish- deputeti demokrat Enkelejd Alibeaj i argumentoi me shtrembërimin e historisë pas masakrës së Gërhotit. Ai kërkoi zbardhjen e së vërtetës, që edhe pas 76 vitesh është ende e pazbardhur. Ndërsa vetë kreu i PBK, Artur Roshi, e ka cilësuar të panevojshme vëmendjen mediatike ndaj një incidenti të tillë. Ai ka pohuar se ashtu si çdo vit, prej vitit 1992, PBKD është organizatore e kësaj ceremonie në bashkëpunim me PD- në. Roshi ka kujtuar përpjekjet e partisë që drejton për ndërtimin e këtyre varrezave dhe kontributin për ndërtimin e memorialit të vendosur aty. “Ata njerëz që bërtisnin e ofendonin, nuk donin as PDnë e as Ballin. Askush nuk u qartësua se çfarë kërkonin konkretisht”, tha Roshi. Dita e 14 Shtatorit shënohet nga Organizata e Ballit Kombëtar në Shqipëri si “Dita e Dëshmorëve Nacionalistë”. Çdo vit, më 14 shtator, kujtohen dhe kryhen homazhe në Gërhot, për 36 luftëtarë nacionalistë të Ballit Kombëtar, mes tyre edhe komandanti, Hysni Lepenica, që ranë 76 vjet më parë, duke luftuar me pushtuesit italianë.