DITA BOTËRORE E NDËRGJEGJËSIMIT PËR LIMFOMAT

ISHP: KANCERI QË PREK QELIZAT E BARDHA, SHENJAT SI TA DALLOJMË

“Gjërat e vogla rrisin vetëbesimin”, ky është slogani i Ditës Botërore të Ndërgjegjësimit për Limfomën ( 15 shtator), i cili ka si qëllim përhapjen dhe njohjen e fakteve në lidhje me limfomat, si dhe në fuqizimin e njerëzve me kancer të sistemit limfatik. Hulumtimet kanë treguar se te pacienti, vetëbesimi rritet kur ai ka informacionin, mbështetjen e duhur dhe eksperiencën pozitive në shërbimet e kujdesit shëndetësor, të cilat luajnë një rol pozitiv në rezultatet shëndetësore të tij. Në këtë ditë, njerëzit në të gjithë botën janë të ftuar të bëjnë gjëra të vogla për të mbështetur dhe fuqizuar personat që jetojnë me limfomë. Çdo vit, mbi 580,000 njerëz në botë diagnostikohen me limfomë. Ekzistojnë më shumë se 80 lloje të limfomave. Çfarë është Limfoma? Limfoma është kanceri që prek qelizat e bardha të gjakut, që quhen limfocite, të cilat janë pjesë e sistemit imunitar të trupit. Limfomat ndikojnë në sistemin limfatik, i cili është pjesë e sistemit imunitar që ndihmon në mbrojtjen ndaj infeksioneve dhe disa sëmundjeve të tjera. Limfomat mund të fillojnë kudo në trup, ku gjenden indet limfatike. Vendet kryesore të indeve limfatike janë: nyjet limfatike, shpretka, timusi, palca e kockave dhe në pjesë të tjera të trupit. Tek individët që kanë limfomë, limfocitet ndryshojnë dhe rriten jashtë kontrollit.

KUSH JANË SHKAKTARËT E LIMFOMAVE?

Shkaqet e limfomave nuk njihen, por ju mund të jeni në rrezik, nëse: · jeni mbi 60 vjeç; · jeni mashkull; · keni një sistem imunitar të dobët nga HIV/ AIDS, nga transplanti i një organi, ose nëse keni lindur me një sëmundje; · keni një sëmundje të sistemit imun si artriti rheumatoid, lupus; · jeni infektuar me virusin e EpsteinBar, Hepatitin C; · keni një të afërm i cili ka patur limfomë.

CILAT JANË SIMPTOMAT/ SHENJAT PARALAJMËRUESE TË SËMUNDJES?

· Ënjtje të gjëndrave limfatike: më shpesh në qafë, sqetull, ose në ije, të cilat janë të padhembshme · Kollë · Vështirësi në frymëmarrje · Temperaturë · Djersitje gjatë natës · Lodhje/ këputje · Humbje në peshë · Kruarje