Juncker, kundër Von der Leyen: Vendosi etiketa antiemigracion
Zv. presidenti Schinas s’po e përdor titullin zyrtar në biografi
Jean- Claude Juncker ka kritikuar Komisionin e zgjedhur Evropian për krijimin e një titulli pune që sugjeron se emigrantët janë një kërcënim për “Mënyrën Evropiane të Jetesës”, duke shfaqur përçarjen më të fundit në Bruksel.
Ursula von der Leyen, Presidentja e ardhshme e Komisionit, njoftoi se Margaritis Schinas, ishzëdhënësi kryesor i Komisionerit Juncker, do të ishte nënpresident për mbrojtjen e “Mënyrës sonë të jetesës evropiane”. Kur Ursula von der Leyen, u përpoq të shpjegonte se çfarë do të përfshinte roli i Schinas në dikasterit me emërtimin e padëgjuar më parë, tha: “Zëvendëspresidenti për mbrojtjen e mënyrës sonë të jetesës evropiane”. Çfarë ishte shfaqur fillimisht si çudi, u kthye në zemërim. Përgjegjësitë e këtij dikasteri do të përfshijnë migracionin dhe politikën e azilit, si dhe sigurinë dhe arsimin. Von der Leyen ka qenë nën presion të vazhdueshëm për të ndryshuar titullin, i cili u markua si “fashist” dhe “thellësisht fyes”. Kritikët e denoncuan shprehjen si një jehonë të retorikës së ekstremit të djathtë që e identifikon Evropën si të bardhë dhe të krishterë, dhe migracionin nga Lindja e Mesme dhe Afrika si një kërcënim për atë identitet. Juncker, Presidenti aktual i Komisionit Evropian, u shpreh në një intervistë në “Euronews” se, “Nuk më pëlqen ideja se mënyra evropiane e jetesës është kundër migracionit. Pranimi i atyre që vijnë nga larg është pjesë e mënyrës evropiane të jetesës”. Dhe njeriu që zonja Von der Leyen e nominuar për këtë rol, Margaritis Schinas nga Greqia, nuk po e përdor titullin zyrtar në biografinë e tij të përditësuar në “Twitter”, ku ka numëruar vetëm fushat e politikave për të cilat ai do të ishte përgjegjës. Schinas tha që ai do të trajtojë çështjen gjatë seancës dëgjimore të tij në Parlamentin Evropian, i cili do të ketë fjalën e fundit për emërimin e tij. Andrew Stroehlein, drejtori i mediave evropiane për “Human Rights Watch” tha se, “Vendosja e migracionit nën një portofol të quajtur mbrojtja e mënyrës sonë të jetesës evropiane “është një shembull tjetër, se si politikanët kryesorë në Evropë po miratojnë inkuadrimin e ekstremit të djathtë. Normalizimi i retorikës së tyre të shëmtuar është një hap i rrezikshëm drejt normalizimit të politikave të tyre abuzive që kërcënojnë demokracinë dhe të drejtat e njeriut”. Migrimi ka qenë prej kohësh një nga çështjet më të ndjeshme të politikave në Bashkimin Evropian, me ardhjen e qindra mijëra refugjatëve dhe emigrantëve të tjerë në 2015 dhe 2016, përfshirë edhe nga vendkalimet e rrezikshme të detit.