Basha nxjerr videon: Rama premtoi shëndetësi falas, e dha me koncesion
Partia Demokratike ka ashpërsuar akuzuat ndaj kreut të Agjencisë së Kadastrës, Artan Lame, në lidhje me punësimet që bëhen në administratë. Përmes një konference për mediat të ishdeputetes Oriela Pampuri, PD e cilëson si teatër daljen e para pak ditëve të kreut të Agjencisë së Kadastrës, Artan Lame, i cili kërkoi që mos t'i ndërhyhet në procesin e përzgjedhjes së punonjësve të rinj. "Propaganda e Edi Ramës me punësimet shtetërore është një nga çështjet penalizuese jo vetëm për integrimin europian, por, mbi të gjitha, për keqfunksionimin dhe korrupsionin endemik, i përhapur në çdo qelizë të administratës shtetërore. Shembull tipik i kësaj propagande është Agjencia e Kadastrës, e drejtuar prej 6 vitesh nga Artan Lame, me emrin e Agjencisë së Legalizimeve. Pak ditë më parë, Artan Lame, pa u skuqur fare, foli për konkurs të ndershëm në plotësimin e disa dhjetëra vendeve të reja të punës, të hapura në ketë agjenci me shtrirje në të gjithë vendin. Por gjithçka është një teatër. Artan Lame, si gjithë kolegët e tjerë pjesë të qeverisë grabitëse të Edi Ramës, nuk mund të organizojnë konkurse të ndershme. Ata dinë vetëm të punësojnë militantë partiakë, që i përdorin në zgjedhje në shkelje të ligjit ndaj kundërshtarit politik. Artan Lame është modeli tipik i kësaj skeme skandaloze që ka mbajtur peng administratën publike gjithë këto vite. Rreth një vit më parë, kjo u provua me një material autentik, të publikuar në media, ku Artan Lame dëgjohet që pranon ndërhyrjen e deputetëve socialistë për marrjen në punë të militantëve dhe përdorimin e tyre gjatë fushatës. Teatri që luhet me shqiptarët dhe tallja e tyre nga Artan Lame dhe shefi tij, Edi Rama, është e qartë. Në vend që ky funksionar i qeverisë të ishte sot në burg për përdorimin e administratës në fushatë, vazhdon të mashtrojë shqiptarët me propagandën e Edi Ramës për punësime me konkurs", tha Pampuri. Në përgjimet e pranverës 2017, të ripublikuara nga PD, dëgjohet kreu i Kadastrës, Artan Lame, duke folur për procesin e punësimit në sektorin që ai drejton, ku i konsideron normale ndërhyrjet e funksionarëve të lartë të PS- së në procesin e rekrutimit të punonjësve me qëllime elektorale.