MAJKO VLERËSON GJENERALIN: MË KUJTONTE BABANË
Përmes një ceremoniali shtetëror, dje qytetarët e Tiranës përcollën gjeneralin më jetëgjatë në Shqipëri, Rrahman Parllakun, në moshën 100- vjeçare.
Homazhet dhe nderimet e fundit gjeneralit iu dhanë në ambientet e Muzeut Kombëtar, aty ku ai kishte organizuar me dhjetëra konferenca dhe festime me veteranët e luftës. Garda e Republikës ishte e pranishme gjatë gjithë ceremonialit, ndërsa ora 14: 00 shënoi daljen e arkëmortit, i cili u vendos mbi shtratin e topit për ta përcjellë me nderime nëpër rrugët e kryeqytetit. Njeriu që kaloi një jetë nga drejtimi i batalioneve në moshë fare të re dhe më pas brigadave dhe divizioneve e deri në krye të Ushtrisë, si shef i Shtabit të Përgjithshëm, po përcillej si hero dhe pse heroizmin më të madh të tij ai e kishte bërë pas viteve ' 90. Rrahman Parllaku u dënua nga regjimi diktatorial i Enver Hoxhës me 25 vjet burg, ndërkohë që puçistët e tjerë që u përfshinë në një grup të madh armiqësor, u pushkatuan. Por Parllaku ishte i vetmi nga ishdrejtuesit komunistë, i cili shërbeu në Ushtri për 30 vjet deri sa u burgos, që do të kërkonte falje për dëmet, vrasjet dhe internimet që kishte bërë regjimi i Enver Hoxhës dhe pse ai ishte një nga vuajtësit e atij regjimi. Pas viteve ' 90, gjeneral Parllaku ishte njeriu më i drejtpërdrejtë, që ia tha politikës në sy të vërtetën, por dhe kërkoi vlerësimin objektiv të historisë, e cila ishte shkruar në mënyrë të njëanshme.
CEREMONIA
Falë këtyre cilësive që lidhen me karakterin e gjeneral Parllakut, ai u nderua dje nga qytetarë të thjeshtë, anëtarë të Shoqatës së Veteranëve të Luftës, por dhe përfaqësues Ministri i Diasporës, Pandeli Majko, vlerësoi figurën dhe karizmën e gjeneral Parllakut, duke kujtuar se ai ishte mik i babait të tij. Parllaku, për të, nuk ka qenë thjesht një gjeneral në paqe, por një mik i babait të tij. "Veç të tjerash ishte një mik i tim eti, i cili nuk e hiqte nga goja edhe kur ai ishte në burg. Edhe për këtë arsye, sa herë e takoja, më nxirrte mallin e tim eti që ndërroi jetë përpara tij", shkruan Majko. Parllaku ishte njeriu që jetoi e luftoi të tria epokat: atë të Luftës, diktaturën dhe më pas demokracinë. "Ish- drejtuesi i formacioneve partizane në kohën e Luftës dhe gjenerali në paqe, Rrahman Parllaku, ka ndërruar jetë. Veç të tjerash, ishte një mik i tim eti, i cili nuk e hiqte nga goja edhe kur ai ishte në burg. Dhe për këtë arsye, sa herë e takoja, më nxirrte mallin e tim eti që ndërroi jetë përpara tij. Dhimbja sot për gjeneral Parllakun ka shumë kuptime. Një partizan më pak dhe një kujtim më shumë. Të qoftë dheu i lehtë, gjeneral!", shkruan Majko. të institucioneve më të larta të vendit. Presidenti i Republikës, Ilir Meta, bëri homazhe dhe la një shënim në librin e përshtypjeve, ndërsa do ta cilësonte gjeneral Parllakun si "partizanin fitimtar antifashist, i cili më pas u burgos dhe u internua nga regjimi diktatorial". "Sot, që është një ditë historike për mbarë popullin dhe kombin tonë, 16 shtatori, Dita e Konferencës së Pezës, dita e besëlidhjes së të gjithë shqiptarëve pa dallim feje, krahine dhe ideje në luftën për liri, nuk e mendoja se do të ishte edhe dita kur do t'i thoshim lamtumirën e fundit gjeneralit Rrahman Parllaku, njërit prej komandantëve më të lavdishëm të Luftës Antifashiste, të luftës për liri, por edhe njërit prej personaliteteve më të mëdha të Ushtrisë sonë, një personaliteti publik me kontribute të jashtëzakonshme në të gjitha kohët", u shpreh Presidenti Meta. Në homazhe morën pjesë dhe kreu i Partisë Demokratike, Lulzim Basha, dhe kryetari i Bashkisë së Tiranës, Erion Veliaj. Intervistën e fundit të jetës së tij, gjeneral Parllaku e dha për gazetën "Panorama", ku ai rrëfeu të vërtetat dhe përjetimet mbi grupin puçist të Ushtrisë, ku në pushkatim shkuan Beqir Balluku, Petrit Dume dhe Hito Çako, krerët e Ministrisë së Mbrojtjes dhe Ushtrisë shqiptare, nën akuzat e tradhtisë ndaj atdheut. Me shumë realizëm, gjeneral Parllaku solli në intervistën e tij planet e luftës për pushtet, që zhvilloheshin në kupolën e pushtetit komunist të kohës, por dhe trajtimin që atij i bëhej gjatë kohës së hetuesisë dhe burgut 25- vjeçar. Sipas tij, ishte lufta e brendshme mes Mehmet Shehut dhe Hysni Kapos për të kapur vendin e pasuesit të Enver Hoxhës, që çoi në spastrimet e mëdha në Ushtrinë shqiptare në vitet ' 70, duke ndryshuar krejtësisht dhe konceptin e organizimit të Ushtrisë.