Olainka tremb Interin, Napoli thyen Liverpulin

Valencia fiton në transfertë ndaj Çelsit, Barça ( x) në Dortmund

Zhang Jindong, nga tribuna, pa të humbasë krijesën e tij në ndeshjen e parë të një kupe që e sheh prezent.

Në pjesën e parë Interi është inekzistent, zgjohet disi në të dytën. Pas golit të shënuar nga Olainka, "San Siro" nxit deri në fund skuadrën për përmbysjen, por regjistrohet vetëm një barazim i vuajtur me autor Barelën. Fitorja, megjithatë, do kishte qenë e tepërt për një skuadër që vuajti formën fizike dhe organizimin e çekëve, duke treguar defekte shqetësuese. Do ketë punë për Konten në prag të derbit.

OLAINKA

Miqtë menjëherë përpiqen të vënë në dukje formën më të mirë fizike dhe shtyjnë duke u shfaqur të rrezikshëm pas pak minutash me një goditje nga distanca të Stançiut, i cili gjen përgjigjen e Handanoviçit. Skuadra e Kontes has vështirësi në kalimin e gjysmëfushës, por veprimet e disa prej elementëve më teknikë, me në krye Sensin, u lejojnë zikaltërve të thyejnë presingun dhe të zhvillojnë manovrën sulmuese. Për rastin e parë konkret të zikaltërve do duhet minuta e 12- të, me De Vrajn që shkëputet me kokë i vetëm në zonën e rreptësisë, por shpërdoron nga pak metra larg portës. Disa çaste më vonë është Lautaro, i cili godet në diagonale: topi "qeth" shtyllën duke krijuar iluzionin e golit. Sfidë e karakterizuar nga kundërsulmet e shpeshta, me Interin që nis të fitojë terren, pavarësisht startit të vakët. Pas Martinezit është D'Ambrozio ai që i afrohet golit të avantazhit në zhvillimet e një goditjeje standarde. Vetë mbrojtësi, në të 29ën vendos në vështirësi Handanoviçin me një pasim të rrezikshëm: portieri slloven, me pak fat, arrin të fitojë faull. Po D'Ambrozio bëhet protagonist në të 34- ën me një tentativë nga jashtë zone, e parrezikshme për portierin Kolar.

Slavia rikthehet në fushë me një tjetër ritëm. Megjithëse zikaltrit e nisin me këmbën e mirë: goditje- kros e Sensit që Kolar grushton, te topi afrohet Lautaro që godet mbi portierin. Kundërpërgjigjet Stançiu me një goditje potente, që bllokohet në hedhje nga Handanoviç. Ndërkohë Kandreva, për shkak të një shqetësimi në shpinë, detyron Konten të kryejë zëvendësimin e parë: italiani del për Lazaron. Rrezikon rëndë Azamoah kur loja ndërpritet për një faull ndaj Traores: arbitri e ndëshkon me karton të verdhë, më pas kërkohet ndërhyrja e VAR- it, pas të cilit kryesori konfirmon sanksionimin. Në të 63- ën, surprizë e miqve: goditje nga pranë zonës e Zelenit, i porsaaktivizuar, mrekulli e Handanoviçit, i cili nuk mundet t'i bëjë asgjë Olainkës, ish- sulmuesit të Skënderbeut, disa hapa larg portës. Pas golit çekët shfrytëzojnë vetëm kundërsulmet, ndërsa Interi vuan goditjen psikologjike. Konte nxjerr edhe Brozoviçin dhe Lautaron për Barelën dhe Politanon. Megjithatë, Slavia arrin të mbajë presionin. Do nevojitej pak fat që zikaltrit të mos dilnin kokulur nga fusha: në të 92- ën Sensi trondit traversën nga goditja e dënimit, Barela godet fluturimthi dhe topi përfundon në rrjetë edhe falë devijimit të Hovorkas. Rrugëtimi në Champions për Interin nis me barazim.

LIGA E KAMPIONËVE

Në takimet e tjera të Ligës së Kampionëve, Napoli ka surprizuar kampionët në fuqi të Liverpulit me një fitore 2- 0 pas penalltisë së Mertens ( 82') dhe golit të Jorentes ( 90+ 2'). Supersfida e mbrëmjes mes Dortmundit dhe Barcelonës ka përfunduar në barazim pa gola. Ndeshja që i shtohet rezultatit surprizues mes Interit dhe Slavias së Pragës. Në të 57- ën minutë, Marko Rojs humbi penallti. Më tej, Valencia ka triumfuar në transfertë përballë Çelsit falë golit të Rodrigos, ndërkohë që për "Blutë e Londrës" ka humbur një penallti Barklei në minutën e 88- të.