U premtuan kalimin e kufirit emigrantëve nga Lindja, i fusin në pyll e i rrahin

Pesë persona janë arrestuar nga Policia e Shkodrës pasi po transportonin disa shtetas nga vendet e Lindjes së Mesme, me qëllim kalimin e paligjshëm të kufirit, kundrejt fitimit, por në fund kanë tentuar edhe t'i grabisin. Të arrestuarit dyshohet se kanë marrë disa shtetas të huaj të vendeve të treta, me qëllim që t'iu jepnin ndihmë për kalim të paligjshëm të kufirit drejt Malit të Zi. Gjatë rrugës, për të shmangur Policinë, kanë ndryshuar drejtim duke i futur klandestinët në pyllin e fshatit Grudë dhe aty kanë i dhunuar fizikisht, me qëllim që t'u vidhin sendet personale. Megjithatë, kur janë ndeshur me rezistencën e tyre, nuk ia kanë arritur dot qëllimit, duke u larguar. Policia e Shkodrës tha dje zyrtarisht se ka finalizuar operacionin e koduar "Stroke", për parandalimin dhe goditjen e dhënies së ndihmës për kalim të paligjshëm të kufirit, kundrejt fitimit. Operacioni është kryer nga Sektori për Hetimin e Trafiqeve të Paligjshme dhe Narkotikëve në Policinë e Shkodrës. "Në pranga 5 shtetas, pasi transportonin disa shtetas nga vendet e Lindjes së Mesme, me qëllim kalimin e paligjshëm të kufirit, kundrejt fitimit. Këta shtetas gjatë rrugës po i transportonin shtetasit e huaj, i kanë dhunuar fizikisht, me qëllim që t'u vidhnin sendet personale", tha dje zyrtarisht Policia. Specialistët për Hetimin e Trafiqeve të Paligjshme dhe Narkotikëve në Policinë e Shkodrës, pas informacioneve të marra se disa persona po transportonin disa shtetas nga Lindja e Mesme, me qëllim kalim e paligjshëm të kufirit kundrejt fitimit dhe se këta shtetas ishin futur në pyllin e fshatit Grudë, kanë organizuar dhe finalizuar operacionin "Stroke", si rezultat i të cilit u identifikuan dhe arrestuan në flagrancë shtetasit: G. N., 23 vjeç, Z. P., 32 vjeç, K. N., 26 vjeç, T. M., 39 vjeç dhe A. D. 24 vjeç, të gjithë banues në Shkodër. "Të arrestuarit e sipërpërmendur dyshohet se kanë marrë disa shtetas të huaj të vendeve të treta, me qëllim për t'i transportuar për në Mal të Zi. Gjatë rrugës për të shmangur Policinë, kanë ndryshuar drejtim duke i futur në pyllin e fshatit Grudë dhe aty kanë dhunuar fizikisht, me qëllim që t'u vidhin sendet personale, por nuk kanë mundur dot dhe janë larguar. Pas hetimeve intensive, u bë identifikimi dhe kapja e autorëve të dyshuar, të cilët u arrestuan për veprat penale ' Dhënie ndihme për kalim të paligjshëm të kufirit' dhe ' Vjedhje me dhunë e mbetur në tentativë, e kryer në bashkëpunim'", tha zyrtarisht Policia. Në cilësinë e provës materiale janë sekuestruar 3 automjete, me të cilat dyshohet se janë transportuar këta shtetas.