Meta me qytetarët në Durrës, Rama anulon Nju Jorkun
Kryeministri mbledh me urgjencë qeverinë për të vlerësuar situatën
Presidenti i Republikës ishte i pari që reagoi dje ndaj goditjeve të forta të tërmetit në disa zona të vendit, duke u kërkuar qytetarëve që të ruajnë qetësinë.
Presidenti i kërkoi institucioneve të monitorojnë situatën e krijuar pas goditjes së vendit nga dy tërmete të forta. "Presidenti i Republikës, Sh. T. Z Ilir Meta, shpreh keqardhjen për tërmetin që ka tronditur vendin tonë e në veçanti Qarkun e Durrësit dhe Tiranës. Presidenti Meta shpreson për sa më pak dëme dhe pasoja ndërkohë që është i rëndësishëm monitorimi i situatës në vazhdimësi dhe informimi i qytetarëve nga strukturat përgjegjëse shtetërore. Presidenti Meta po e ndjek situatën me vëmendje dhe shqetësim", u shpreh zëdhënësi i Presidentit, Tedi Blushi. Ndërkaq, Kryeministri Rama, i cili ishte nisur për në Nju Jork për të marrë pjesë në punimet e Asamblesë së Përgjithshme të Kombeve të bashkuara, ndërpreu fluturimin e tij dhe u kthye për në Tiranë, ku lajmëroi se do të ketë një mbledhje urgjente qeverie në mesnatë. Ndërkohë, gjatë orëve të pasdites, Presidenti i Republikës ishte në qarkun e Durrësit, i cili mori dhe goditjen më të fortë nga ky tërmet. Pas takimit me prefektin e Durrësit, kreu i shtetit apeloi qytetarët që të ruajnë qetësinë. "Të jenë në koherencë në raport me mediat me informacionet që jepen nga strukturat shtetërore dhe qeverisë vendore dhe qëndrore për të bashkëpunuar ngushtë dhe evidentuar pasojat e goditjeve të deritanishme dhe për të ndjekur situatën me gatishmëri dhe qetësi maksimale. U njoha nga prefekti dhe përfaqësuesi i Shtabit të Emergjencës për punën që po bëjnë në terren në koordinim dhe me strukturat qëndore. Është e rëndësishme të evidentohet çdo dëmtim dhe të merren masa për të verifikuar pasojat që mund të kemi dhe për të ardhmen, sidomos në drejtim të banesave dhe objekteve që mund të jenë dëmtuar dhe që mund të jenë problematike për akomodimin e qytetarëve. Sipas kreut të shtetit, "jemi në kushtet e një vigjilencë të vazhdueshme dhe të përhershme se jetojmë në një rajon problematik. Është koha për të qenë të vëmendshëm dhe është e rëndësishme të punohet me një kordinim efikas nga të gjitha strukturat shtetërore edhe bashkëpunim të komunitetit me këto struktura", tha Presidenti i Republikës.