Veliaj me vonesë, Rama: “A nuk mund ta shtyjmë Ditën pa makina?”
Momentet e vështira të krijuara nga tërmeti i fuqishëm ditën e shtunë shkaktuan një përplasje të Kryeministrit Edi Rama me kryebashkiakun e Tiranës Erjon Veliaj. Ditën e djeshme, në mëngjes, Kryeministri Edi Rama thërriti një mbledhje me qeverinë, deputetët dhe kryetarët e bashkisë për t'u organizuar për takimet me banorët e prekur. Por teksa mbledhje nisi, në sallë mungonte kryetari i Bashkisë së Tiranës Erjon Veliaj. Megjithatë, kreu i qeverisë nisi mbledhjen dhe pasi i dha fjalën Kryetares së Bashkisë së Durrësit, Rama tentoi të kapërcente situatën duke ia dhënë fjalën dikujt tjetër meqë z. Veliaj mungonte. Ndërsa u lajmërua se kishte mbërritur, Rama iu drejtua me ironi kryebashkiakut.
DEBATI Edi Rama: Mirë atëherë, meqë kryetarin e Bashkisë së Tiranës nuk e kemi të pranishëm... Nga salla: Jo, jo, e kemi. Edi Rama i drejtohet Veliajt: Atë ditën pa makina, mund ta shtyjmë për një ditë tjetër ne, apoo?
Veliaj: Faleminderit, Kryeministër. I kemi koncentruar të gjitha aktivitetet në "Sheshin Skëndërbej" edhe si një mënyrë për të qetësuar njerëzit që duan të dalin duke pasur parasysh situatën.
Më tej, kryebashkiaku Veliaj vijoi me raportimin në lidhje me situatën në kryeqytet. Ky nuk ishte rasti i vetëm ku Kryeministri Rama shfaqi nervozizëm ndaj kryebashkiakut Veliaj. Rasti i dytë ishte kur Kryeministri e pyet nëse kishte nevojë për mbështetjen e kryebashkiakëve të tjerë dhe të deputetëve dhe Z. Veliaj i përgjigjet duke i dhënë një ide që ta praktikojnë edhe bashkitë e tjera për të mbledhur ndihma në ushqime dhe veshmbathje.