Banorët e Durrësit, ende në panik, kalojnë natën jashtë
Numërohen të paktën 188 banesa dhe 9 pallate që janë dëmtuar
Frika nga goditja e një tërmeti të mundshëm, po i mban ende jashtë shtëpive banorët e Durrësit, ku edhe ishte epiqendra e lëkundjeve.
Disa prej tyre kanë zgjedhur të qëndrojnë në çadrat e ngritura brenda në stadiumin “Niko Dovana”, ndërsa të tjerë po qëndrojnë nëpër sheshe e hapësira publike. Kjo ishte nata e dytë që banorët e qytetit bregdetar po kalojnë në qiell të hapur, pasi banesat e tyre janë të amortizuara ose gjenden në katet e larta të pallateve shumëkatëshe. Gjatë 24 orëve, në Durrës u regjistruan më shumë se 28 lëkundje të forta, por dy lëkundjet e para të orës 16: 00, të së shtunës, rezultuan fatale për dhjetëra objekte që pësuan dëmtime. Nga Shtabi i Emergjencave Civile bëjnë me dije se deri në orët e vona të mbrëmjes së djeshme ishin regjistruar të paktën 188 banesa të dëmtuara dhe 9 pallate të plasaritura. Këto janë vetëm shifra paraprake, pasi grupet e punës ndodhen në terren dhe po vazhdojnë me intensitet misionin për të dokumentuar çdo dëmtim që la pas tërmeti i fuqishëm, i cili rezulton të jetë më i fuqishmi i 30 viteve të fundit. Sakaq, të njëjtat burime thanë për gazetën se shkuan në spital për ndihmë mjekësore rreth 63 persona me fraktura të ndryshme.
Pavarësisht se situata është qetësuar dhe lëkundjet së shtunës dhe të orëve të para të mëngjesit të së dielës nuk po pasohen nga tronditje të tjera, banorët e qytetit të Durrësit vijojnë të qëndrojnë në qiell të hapur, pasi kanë frikë të futen në shtëpitë e tyre. Autoritetet, prej gjithë ditës së diel, vijuan shpërndarjen e ndihmave, ndërsa në ambientet e brendshme të stadiumit “Niko Dovana” ngritën dy stenda të mëdha dhe vunë në dispozicion mbi 200 shtretër e dyshekë. Ndërkohë, mijëra qytetarë, sikurse natën e parë, edhe sot kanë gdhirë nëpër lulishte dhe sheshe publike. E gjendur në njërën prej çadrave të montuara në stadiumin e Durrësit, fill pas tërmeteve, Ervehe Çepja tregon për gazetën “Panorama” se ku ndodhej në çastet e lëkundjeve dhe se si e përjetoi gjithçka që ndodhi. “Shtëpinë e kam në katin e pestë të një pallati në lagjen 18. Nuk dija çfarë të bëja. Thash se më pushoi zemra nga frika. Bufeja, televizori dhe disa objekte zbukurimi u rrëzuan. Shtëpia është plasaritur e gjitha. Kam frikë të kthehem në shtëpi, prandaj edhe jam këtu tek kjo stenda”, tha e moshuara. Tërmeti i fuqishëm që u regjistrua pasditen e së shtunës la pas dëme të shumta materiale. Situata më problematike paraqitet në rrethinat e Durrësit, zona ku objektet janë të amortizuara. Megjithatë, dëme janë regjistruar edhe në qytetin e Durrësit, në apartamentet që ndodhen në pallatet e ngritura në lagjen 4 të qytetit. Isuf Sina, një prej banorëve të lagjes 4, të cilit iu shkaktuan dëme nga lëkundjet e tërmetit, tregon makthin e përjetuar. “Po shkoj rreth 70 vjeç dhe nuk kisha parë një tërmet kaq të fuqishëm. Siç e shikoni, ka shkaktuar dëme të mëdha. Muret janë plasaritur. Nuk di çfarë të them, natën e parë e kaluam përjashta dhe do të kalojmë edhe sot ( dje)”, tha Sina.