PER ÇDO FAMILJE Emrat nga ' 93, pronarët që ndajnë 50 milionë USD
Zbardhet skema e qeverisë për ndarjen e fondit 5 miliardë të kompensimit për tri vite. Gazeta boton emrat dhe faturën e secilës familje të ish- pronarëve që nga viti ‘ 93
Në tri vitet e ardhshme, qeveria pritet të ndajë për pronarët një fond me vlerë rreth 150 milionë dollarë.
Pra, çdo vit në arkën e ATP- së do të adresohen rreth 50 milionë dollarë, të cilat do të përdoren për kompensimin e pronarëve. Por këtu përfshihet edhe fondi i vënë në dispozicion nga Agjencia e Kadastrës, në funksion të shpërblimit financiar të pronarëve që preken nga ndërtimet informale. Të dhënat janë pjesë e programit buxhetor afatmesëm të Ministrisë së Financave. Çfarë vihet re, është se shuma që do të transferohet në arkën e Agjencisë në tri vitet e ardhshme, është larg vlerës së parashikuar në ligjin e ndryshuar tri vite më parë. Konkretisht, në vitin e 5- të të zbatimit të skemës së re, pra në 2020, parashikohej që shteti të disbursonte vetëm për pronarët e shpronësuar nga regjimi komunist rreth 40 milionë dollarë. Ndërkohë, në dy vitet e ardhshme, pra në vitin 2021 dhe 2022, kjo vlerë do të shkonte rreth 50 milionë dollarë, pa përfshirë këtu fondin e Kadastrës.
KOMPENSIMI Sa i takon fondit të këtij viti, në arkën e ATP- së janë edhe 37 milionë dollarë që pritet të ndahen në muajt e mbetur të këtij viti. Nëse kjo nuk ndodh, atëherë ato transferohen për t'u përdorur vitin që vjen. Në fillim të këtij viti, Agjencia ka përmbyllur edhe vlerësimin financiar për më shumë se 25 mijë vendime të formës së prerë. Vlerësimi është bërë bazuar në zërin kadastral që prona ka në momentin e konfiskimit, ndërsa çmimet për metër katror janë ato të konfiguruara në hartën e miratuar në 2016. Përfundimi i vlerësimit ekonomik u jep mundësi të gjithë atyre, që janë njohur me masën e përfitimit të paraqiten në Agjenci për të aplikuar. Pavarësisht apelit të vazhdueshëm të ATP- së për të aplikuar dhe lehtësimit të praktikave për ndarjen e parave, sërish ka pasur një numër të ulët të pronarëve që kanë depozituar kërkesë. Kjo është rrjedhojë edhe e ndryshimit të skemës. Janë jo të paktë ata që mendojnë se vendosja e pragut për kompensimin financiar deri në 20 për qind të vlerës që ka prona, është penalizuese. Kjo pakënaqësi ka sjellë edhe hezitim për të aplikuar.
SKEMA Kështu, me ndryshimet e bëra në skemën e kompensimit, pronarëve iu lind e drejta të kompensohen financiarisht vetëm për 20% të vlerës së faturës, por jo më shumë se 10 milionë lekë të rinj. Për pjesën e mbetur do të mbulohen nga fondi i tokës që ATP- ja disponon.