Rama në OKB, takon kryeministrin grek Mitsotakis: Bashkëpunim i hapur
Mediat greke, Mitsotakis- Ramës: Ju mbështesim në BE, por përmbushni kushtet që u përkasin të drejtave të pakicës greke
Kryeministri Rama pritet të takohet në Nju Jork me Presidentin e SHBA- ve, Donald Trump, ndërsa takimin e parë e zhvilloi me Kryeministrin grek, Kiriakos Mitsotakis, në kuadër të punimeve të Asamblesë së Përgjithshme të OKB- së.
Në një postim në “Facebook”, shoqëruar me fotografinë e takimit, kreu i qeverisë e cilëson atë si një bashkëbisedim të hapur. “OKB, Nju Jork – me Kryeministrin e Greqisë, Kiriakos Mitzotaqis. Prezantim miqësor dhe bashkëbisedim i hapur”, shkruan Rama. Por kanë qenë mediat greke që kanë zbardhur qëndrimin e Kryeministrit Mitsotaqis në këtë takim, në lidhje me vendimin për hapjen e negociatave mes Shqipërisë dhe Bashkimit Europian. Gazeta “Protothema” shkruan se Kryeministri i Greqisë ka theksuar gjatë takimit, se Shqipëria duhet të përmbushë kushtet e përcaktuara nga BE, përfshirë ato që u përkasin të drejtave të pakicës kombëtare greke. Sipas së njëjtës media, Kryeministri grek është shprehur në mbështetje të perspektivës së pranimit të Ballkanit Perëndimor në BE, me kusht që të përmbusheshin të gjitha kushtet e përcaktuara nga Bashkimi Europian. “Në veçanti, z. Mitsotakis theksoi çështjen e vetëvendosjes dhe të drejtat pronësore të pakicës etnike Greke në Shqipëri”, thekson “Protothema”. Mitsotakis dhe Rama ranë dakord të kalojnë në një diskutim më të gjerë të marrëdhënieve bilaterale, në kuadër të Samitit Euro- Arabik, që do të zhvillohet në Athinë, më 29- 30 tetor 2019.
GREQIA Kryeministri grek, Kyriakos Mitsotakis, u shpreh pak ditë më parë kundër hapjes së negociatave të Shqipërisë me Bashkimin Europian. Duket se minoriteti grek në Shqipëri është bërë pengesë për të marrë votën pro të Greqisë për hapjen e negociatave. Gjatë fjalës së tij të parë si Kryeministër i Greqisë në ceremoninë e inaugurimit të Panairit të 84- t Ndërkombëtar të Selanikut, Mitsotakis tha se pret të shohë hapa konkretë nga qeveria e Shqipërisë në lidhje me të drejtat e minoritetit grek në Shqipëri. “Greqia nuk do të miratojë hapjen e negociatave anëtarësuese të Shqipërisë në BE, në rast se unë nuk shikoj akte konkrete për heqjen e diskriminimit ndaj minoritetit etnik grek”, ka deklaruar Mitsotakis ndër të tjera. Mediat greke njoftojnë për kontakte të vazhdueshme të përfaqësuesve të minoritetit grek në Shqipëri me Kryeministrin e ri të Greqisë, kryesisht kreun e PBDNJ- së dhe drejtues të shoqatës OMONIA. Kreu i qeverisë greke ka theksuar se për këtë çështje ka biseduar gjatë vizitave të tij të fundit me Presidentin francez, Makron, Kryeministrin holandez, Route, dhe Kancelaren gjermane Merkel. “Jam plotësisht i qartë në këtë çështje, ia kam transmetuar edhe Presidentit Makron, edhe Kryeministrit holandez Route, edhe Kancelares Merkel, pasi priten bisedime në Këshillin Europian në tetor. Nuk jemi atje ende. Do të duhet të shohim ndryshime me vepra të qëndrimit të qeverisë shqiptare ndaj minoritetit kombëtar grek”, u shpreh Mitsotakis.