Shkreli: Pallatet në Tiranë durojnë tërmete shumë të forta

Zëvendësministri i Infrastrukturës, Artan Shkreli, u shpreh i sigurt se pallatet e ndërtuara në 20 vitet e fundit janë më të sigurt dhe rezistentë ndaj lëkundjeve sizmike. Në një intervistë në “Top Channel”, Shkreli u shpreh se ndërtesat e ngritura pas vitit 2000 janë të projektuara që të durojnë pa probleme tërmete deri në shkallën 7,5 ballë. “Nuk kam pasur drojën që pati pjesa më e madhe e popullatës, pasi unë jam shumë koshient për fortësinë dhe sigurinë që kanë ndërtesat, sidomos ato të ndërtuara pas vitit 2000. Ideja është që sa më vonë të jenë ndërtuar pallatet, aq më të sigurt janë. Kjo është një aksiomë që duhet ta marrim parasysh, pasi kushtet teknike janë përmirësuar në raport me qëndrimin që duhet të mbajë konstruktori që llogarit strukturat e një objekti kundrejt sizmës, pra, lëkundjeve të tërmetit. Kështu që kemi pasur një përmirësim me objektet e ndërtuara para viteve ‘ 70. Pastaj kemi edhe një tjetër përmirësim në vitet ‘ 80, dhe me ndërtimet që bëhen tani, llogaritet që Tirana të durojë goditje tërmeti mbi 7.5 ballë”, u shpreh zv. ministri i Infrastrukturës. Më tej, Shkreli theksoi se lëkundja e tërmetit, edhe pse e ka pasur epiqendrën në det, pranë Durrësit, është ndjerë më shumë në Tiranë për shkak të gjeologjisë së tokës. “Këtu kemi edhe një paradoks, pasi Durrësi ishte epiqendra e lëkundjes, por ndjeshmëria ishte më e fortë në Tiranë. Shkaku i këtij lloj fenomeni është terreni dhe gjeologjia e tokës, pasi këto të dyja janë faktorë shumë të rëndësishëm në përcaktimin e intensitetit të tërmetit. Nga të dhënat paraprake, Tirana është goditur më shumë për shkak të valës sizmike. Kjo është në varësi të terrenit, pasi ka terrene që e absorbojnë goditjen sizmike dhe ka raste që e amplifikojnë dhe kjo e fundit ka ndodhur me Tiranën, ku vala sizmike është amplifikuar dhe ka qenë gati dyfish me Durrësin”, tha Shkreli. Sipas Artan Shkrelit, është ngritur një grup pune dhe do të verifikohen rast pas rasti të gjitha godinat e prekura nga tërmeti, për të vlerësuar më pas shkallën e dëmtimit të tyre. “Ne kemi ngritur grupin e punës dhe shumë shpejt do të identifikojmë objektet që kanë probleme strukturore, pra që kanë të bëjë me qëndrueshmërinë ose jo të objekteve. Do të bëjmë identifikimin e objekteve që janë të dëmtuara dhe duhet të shpallen të pabanueshëm dhe cilat janë ato që mund të riparohen dhe nuk paraqesin më probleme në vazhdim. Do shikohen rast pas rasti lloji dhe shkalla e dëmtimit dhe ndërhyrjet që do të jenë të nevojshme. Për të gjithë banorët që i kanë pasur banesat e tyre të siguruara, kostot do t’i paguajnë kompaninë e sigurimit, ndërsa për banorët që nuk i kanë pasur shtëpitë e siguruara, sigurisht që do të ketë një marrje përgjegjësie nga ana e shtetit. Fatura financiare do të dalë pasi të mbarojë matja e dëmeve dhe dëmet do të ndahen në tri shkallë në dëme të lehta, në dëme që mund të riparohen dhe në objekte që duhen shembur”, tha zv. ministri.