Banesat e dëmtuara, Meta: Të përcaktohet rezistenca
“Qeveria të ftojë Agjencinë Ndërkombëtare të Energjisë Atomike”
Presidenti Ilir Meta i kërkoi dje qeverisë që të ftojë Agjencinë Ndërkombëtare të Energjisë Atomike, për të përcaktuar sigurinë dhe rezistencën e banesave, pallateve dhe godinave të dëmtuara nga kjo fatkeqësi natyrore.
Përmes një mesazhi, kur e gjithë vëmendja mediatike ishte përqendruar te paniku në popullatë për tërmete të parashikuara me intensitet edhe më të fortë, kreu i shtetit kërkon ruajtjen e qetësisë dhe bashkëpunimit të të gjithë faktorëve, përfshirë dhe atyre mediatikë. “Presidenti i Republikës, SH. T. Z., Ilir Meta, vlerëson ruajtjen e qetësisë nga të gjithë dhe rëndësinë e frymës së bashkëpunimit dhe solidaritetit njerëzor, pa përjashtim, nga aktorët institucionalë, politikë, shoqërorë dhe mediatikë, për normalizimin e plotë të situatës, pas tronditjeve të ditëve të fundit. Transparenca dhe përgjegjshmëria maksimale për evidentimin e pasojave është tepër e rëndësishme në këto momente”, thuhet në mesazhin e Presidentit të republikës. Sipas tij, në periudhën e tanishme, kur institucionet duhet të merren me rikuperimin e dëmeve materiale të tërmetit, do të ishte e nevojshme edhe angazhimi i institucioneve kompetente ndërkombëtare për sigurinë e banesave. “Në veçanti, vlerësimi teknik i banesave, pallateve dhe godinave të dëmtuara është tepër i domosdoshëm për të ardhmen. Ndaj, duke vlerësuar dhe solidaritetin e vendeve partnere dhe Bashkimit Europian, Presidenti Meta i kërkon qeverisë të ftojë zyrtarisht edhe Agjencinë Ndërkombëtare të Energjisë Atomike, që ka kapacitetet e duhura për të përcaktuar sigurinë dhe rezistencën e banesave, pallateve dhe godinave të dëmtuara nga kjo fatkeqësi natyrore”, vijon Presidenti në mesazhin e tij. Për kreun e shtetit, askush nuk duhet të keqpërdorë situatën e krijuar në dëm të interesit të qytetarëve. “Keqpërdorimi nga kushdo i kësaj situate, nuk është rruga e duhur për të përballuar një shqetësim të përgjithshëm, në mënyrë të bashkuar dhe të përgjegjshme, vetëm në interes të qytetarëve të traumatizuar nga tronditjet dhe pasojat në banesat e pronat e tyre. Të gjithë duhet të shtojnë kontributet pozitive dhe solidare në bazë të përgjegjësive institucionale, politike, shoqërore dhe qytetare”, përfundon kreu i shtetit mesazhin e tij për institucionet e vendit.