Banesat e dëmtuara nga tërmeti në Tiranë, procedura për t’i rikuperuar
Bashkia e Tiranës ka marrë përsipër rikuperimin e banesave të dëmtuara nga tërmeti i së shtunës. Përveç identifikimit në terren nga ana e specialistëve të pushtetit vendor, kreu i bashkisë, Erion Veliaj, apelon familjet e prekura ta ndjekin vetë këtë çështje, duke raportuar dëmin në njësitë përkatëse. “Rendi i punës për menaxhimin e emergjencave është ky: shkon te njësia administrative, aty listohesh, inventarizohet dëmi, plotësohet formulari, pastaj ju bëni lidhjen me ekipin tonë të vlerësimit, i cili plotëson dokumentacionin dhe i gjithë fondi që kaloi dje, pjesëtohet sipas nevojave”, tha kryebashkiaku dje në mbledhjen me shtabin e Emergjencave Civile. Në ndihmë të bashkisë, kanë ardhur edhe kompanitë e ndërtimit, të cilat do të marrin përsipër dëmin në banesat që duhen rindërtuar nga e para. Përmes nismës “Adopto një shtëpi” do të rindërtohen banesa të parikuperueshme, kryesisht në fshatrat afër vatrës së tërmeteve. Sakaq, Bashkia e Tiranës, përmes një akti normativ do të sigurojë që lejet e ndërtimit për këto shtëpi të bëhen automatike, brenda ditës dhe pa asnjë detyrim monetar si për pronarin e shtëpisë, edhe ndërtuesin që zgjedh të kontribuojë. Një zgjidhje e ngjashme po kërkohet të gjendet edhe për ndërtesat afër qendrës së qytetit. “Për pallatet sovjetike, struktura vërtet mund të jetë në rregull, por gjithsesi mbeten pallate me mballoma. Mund t’ia vlejë që ato të rizhvillohen si banesa sociale, pra të prishim 3katëshet dhe t’i bëjmë 5- katëshe, duke fituar edhe disa apartamente të tjera, për të tjerë njerëz në nevojë nga zona e Kombinatit, Misto Mames, Yzberishtit. Pra, aty mund t’ia vlejë një zgjidhje afatgjatë”. Bashkia e Tiranës ka ndarë veç një fond emergjence, që do të përdoret për rikuperimin e dëmeve materiale në çdo shtëpi të prekur, disa prej të cilave kërkojnë rindërtim.