Banorët i rikthehen jetës normale, ikin nga çadrat
Të strehuarit e vetëm janë 60 persona në godinat e Kovaleshencës
Pas një fundjave stresuese mes panikut dhe frikës, qytetarët durrsakë iu rikthyen normalitetit.
Edhe ata qytetarë që kishin braktisur shtëpitë dhe apartamentet e tyre nga frika dhe kaluan dy net në qiell të hapur nëpër sheshe dhe kampe emergjencash, janë kthyer në banesat e tyre. Kjo është për shkak të motit të keq që pllakosi qytetin bregdetar të Durrësit mbrëmjen e djeshme. Tri stendat e ngritura te stadiumi "Niko Dovana", që prej paradites së djeshme janë bosh, pasi qytetarët që u strehuan aty u kthyen nëpër shtëpitë e tyre. Ndërkohë, vetëm 60 persona vijojnë të qëndrojnë në ambientet e godinave të kovaleshencës së Ministrisë së Mbrojtjes. Lëkundjet e fuqishme të tërmetit lanë pas dëme të shumta materiale, por fatmirësisht jo dëme serioze në njerëz. Dhjetëra qytetarë që kanë pësuar dëme në banesat e tyre nga lëkundjet e tërmetit janë drejtuar pranë rajoneve të bashkisë për të bërë deklarimet e tyre. Në të gjashta rajonet e Bashkisë Durrës, zyrtarët e bashkisë kanë marrë shënim të gjitha deklarimet e qytetarëve dhe brenda 5 ditësh do të kryhet evidentimi në terren për të gjitha rastet e denoncimeve. Qytetarët shprehen se dëmtimet janë të ndryshme, më së shumti plasaritje muresh dhe rënie e suvasë. Kryetari i Njësisë Bashkiake nr. 3, Myslim Hasanaj, shprehet se deri tani në këtë rajon janë bërë 45 denoncime për dëmtime të banesave nga ana e qytetarëve. Ai shprehet se nga verifikimet e bëra deri tani nga grupi i punës, nuk është konstatuar asnjë banesë që përbën rrezik për t'u shembur. Paralelisht me punonjës të bashkisë dhe rajoneve bashkiake, në terren janë shpërndarë edhe specialistë të ndërtimit dhe inxhinierë, për të parë shkallën e dëmit që kanë pësuar ndërtime të llojeve të ndryshme. Këshilli Bashkiak i Durrësit në një mbledhje të jashtëzakonshme miratoi fondin prej 10 milionë lekësh për mbulimin e dëmeve të shkaktuara nga tërmeti i fuqishëm i 21 shtatorit. Ky fond është pjesë e fondit të kontigjencës së buxhetit 2019 të Bashkisë Durrës. Fondi i bashkohet atij prej 20 milionë lekësh të akorduar nga Bashkia Tiranë për Durrësin. Këshilltarët bashkiakë dhuruan pagesën e tyre të muajit shtator, prej 10 mijë lekësh për familjet e prekura nga tërmeti. Kryebashkiakja Valbona Sako deklaroi se në këto kushte të vështira, fondi prej 10 milionë lekësh, i miratuar në mbledhjen urgjente të Këshillit Bashkiak, vjen si një ndihmë e parë për të dëmtuarit që po verifikohen në terren prej 16 grupeve të ngritura. Grupet kanë në përbërje të tyre kreun e njësisë administrative, një punonjës të kësaj njësie, një inxhinier ndërtimi dhe një të Emergjencave Civile. Sako theksoi se qytetarët nuk duhet të abuzojnë me deklarimet e tyre për të përfituar nga situata. "Në këto ditë të vështira, po përballemi me një fluks abuzimesh. Po abuzohet shumë. Grupet janë ndërtuar të tilla që të evidentojnë me saktësi shkallën e dëmit në banesa", tha Sako. Sipas kryebashkiakes, dëmshpërblimi për secilin prej banorëve të prekur nga dëmtimet e shkaktuara nga tërmeti do të kalojë në numra llogarie të tyre, në mënyrë që i gjithë procesi të jetë transparent.