Balluku: Janë 500 objekte të prekura nga tërmeti
TIRANE - Dy ditë pas tërmetit të fortë, ministrja e Infrastrukturës, Belinda Balluku, ka mbledhur në një konferencë ekspertë të Institutit të Ndërtimit dhe inxhinierë për të ngritur grupin e vlerësuesve për qëndrueshmërinë e objekteve që kanë pësuar dëmtime. Bëhet fjalë për të paktën 500 objektet, të cilët janë cenuar nga lëkundjet. Gjatë fjalës së saj, Balluku u shpreh se Banka Botërore mbështet të gjitha financimet për të gjitha dëmtimet në rrjetin energjetik. "Ministria e Infrastrukturës deklaron se të gjitha akset rrugore janë të aksesueshëm, përfshirë edhe ato zona që u prekën nga tërmeti i 21 shtatorit. Ujësjellësit janë të gjithë funksionalë. Portet dhe aeroportet e Shqipërisë kryejnë funksionet me normalitet të plotë. Aktet e verifikimit duhen mbyllur sa më shpejt për 500 ndërtesat e deklaruara me pasoja nga tërmeti e më pas të vazhdojmë me aktet e vlerësimit. Jemi me fat sepse nuk kishte viktima. Kemi kërkuar ndihmën e inxhinierëve të nderuar", theksoi Balluku. Ministrja nënvizoi se pas largimit të Kryeministrit Edi Rama për vizitë në Organizatën e Kombeve të Bashkuara, në krye të menaxhimit të situatës është zv. kryeministri Erion Braçe. "Kemi shpërndarë grupe në zonat më të prekura. Edhe kompanitë që nuk u jemi drejtuar, na kontaktuan. Sot gjendemi me kapacitete të mëdha për të nisur punën në terren. Në krye të qeverisë, në momentin që Rama ndodhet në SHBA, ndodhet zv. kryeministri, që është atje në terren. Akti i verifikimit u jep sigurinë njerëzve për të hyrë në banesa, pastaj do të kalojmë në aktin e vlerësimit, pasi shteti do marrë përsipër gjithçka. Përveç ndihmës, është e rëndësishme edhe fjala e ngrohtë", u shpreh Balluku.