Dëmet nga tërmeti, AMF: Qytetarët të informohen për përfitimet nga sigurimi
TIRANË - Tërmeti i fortë i së shtunës në mesditë ka ngjallur interes te shumë qytetarë për të siguruar banesën. Shkak për këtë është bërë dëmtimi i një numri të madh banesash nga lëkundjes që vijojnë ende. Për këtë arsye, Autoriteti i Mbikëqyrjes Financiar u bën thirrje të gjithë qytetarëve të interesuar se mund të marrin informacion më shumë në lidhje me sigurimin e pronave dhe për përfitimet që kanë nga kontrata e sigurimit të banesës për dëmet që ka shkaktuar tërmeti. AMF nënvizon se çdo kompani sigurimi ofron produkte për sigurimin vullnetar të pronës dhe banesave nga katastrofat natyrore. "Nisur nga situata e ditëve të fundit, shkaktuar nga tërmeti i datës 21 shtator 2019, çdo qytetar mund të marrë asistencë pranë AMF- së për t'u informuar për përfitimet nga kontratat e sigurimit të pronës dhe banesave nga katastrofat natyrore si tërmetet, zjarri, përmbytjet etj. Për të gjithë ata që disponojnë një kontratë të tillë dhe kanë nevojë për informacione në lidhje me përfitimet nga kontrata, të drejtohen pranë shoqërive të sigurimit ku janë siguruar. AMF për çdo asistencë, problematikë apo ankesë, vendos në dispozicion linjat e komunikimit si më poshtë: Autoriteti i Mbikëqyrjes Financiare, Rruga "Dora D'Istria" Nr. 10, Kutia Postare 8363, Tiranë, Shqipëri, Numri i gjelbër: 0 800 69 69, Tel: + 35542257560, Email: konsumatori@ amf. gov. al dhe regjistri online i ankesave: https:// crm. amf. gov. al/. Autoriteti i Mbikëqyrjes Financiare informon të gjithë qytetarët se çdo shoqëri sigurimi ofron produkte për sigurimin vullnetar të pronës dhe banesave nga katastrofat natyrore, si një mundësi e mirë për t'u mbrojtur nga katastrofat natyrore", bën me dije AMF.