Prokuroria e Dibrës zgjat hetimet për dosjen e vjedhjes së votave

Pas regjistrimit të procedimit për dosjen "184", dy prokurorët e Prokurorisë së Dibrës kanë zgjatur me tre muaj hetimet. Vendimi është marrë nga drejtuesi Rifat Kojku dhe prokurorja Belina Zeneli, të cilët kanë marrë në dorë hetimet e mëtejshme për një nga dosjet më të bujshme, që kanë pasur Krimet e Rënda. Kjo dosje është regjistruar për veprat penale të "Dhënies së shpërblimeve dhe premtimeve", "Kanosjes apo dhunimit ndaj pjesëmarrësve në zgjedhje", "Shpërdorimit të detyrës", "Dhënies së shpërblimeve dhe premtimeve", si dhe "Kanosjes apo dhunimit ndaj pjesëmarrësve në zgjedhje", të kryera në bashkëpunim. Kujtojmë se Prokuroria për Krime të Rënda, pas tri vitesh hetime, shpalli moskompetencën në korrik dhe dërgoi dosjen në Prokurorinë e Dibrës me argumentin se nuk janë konstatuar vepra penale që hetohen dhe gjykohen nga Krimet e Rënda. Ndërkohë, Prokuroria e Dibrës e ka refuzuar fillimisht dosjen në katër argumente. Së pari, veprat penale janë kryer nga grupi i strukturuar kriminal dhe për këtë vepër është kompetente Prokuroria për Krime të Rënda. Së dyti, prokurori duhet t'i ishte drejtuar gjykatës për pushimin e akuzave dhe jo të procedonte me ndryshim të cilësimit juridik. Së treti, prokurorët e Prokurorisë Dibër janë në kushtet e konfliktit të interesit dhe nuk mund ta hetojnë çështjen në fjalë dhe së katërti, Prokuroria Dibër nuk ka staf të mjaftueshëm për të përballuar këtë çështje. Këto argumente u rrëzuan nga Prokuroria e Përgjithshme, që vendosi përfundimisht që hetimi të bëhej nga kjo Prokurori. Hetimet për dosjen 184 kanë nisur në vitin 2016, pas akuzave publike të bëra nga opozita për vjedhjen e votave gjatë përsëritjes së procesit zgjedhor në Dibër. Kujtojmë se pas një skandali seksual, dha dorëheqjen drejtuesi i bashkisë në atë kohë, Shukri Xhelili. Prokuroria vuri nën përgjim një sërë numrash në atë kohë, ndërsa hetimet u zgjatën në kohë për një periudhë prej 3 vitesh, ku nga rezultati, duket se Prokuroria e Krimeve të Rënda nuk ka kryer asnjë veprim tjetër hetimor përveç përgjimeve.