Osmani denoncon 400 mijë euro humbje në ditë nga korrupsioni
Ja çfarë premtojnë pesë kandidatët në zgjedhjet e monitoruara nga BE
Fushata zgjedhore për zgjedhjet e parakohshme të 6 tetorit në Kosovë zyrtarisht do të fillojë më 25 shtator dhe do të zgjasë 10 ditë, por partitë politike prej kohësh e kanë nisur fushatën dhe premtimet e tyre.
Në këto zgjedhje do të garojnë 25 subjekte politike/ koalicione parazgjedhore. Janë pesë kandidatë, mes tyre vetëm një femër. Vjosa Osmani e PDK- së, gjatë fushatës së saj të së hënës, ka ofruar sigurim shëndetësor për qytetarët brenda vitit të parë të qeverisjes. Osmani ka thënë se do të rrisin buxhetin për sektorin e shëndetësisë në 200 milionë euro. Ajo ka shtuar se shëndetësia do të jetë prioritet dhe shtyllë kryesore e programit të LDKsë, sipas KTV. Por një nga pikat më të forta të saj në fushatë është edhe lufta kundër korrupsionit. Duke iu kundërvënë rivalëve të saj dhe PDK dhe AAK që kanë qenë në pushtet, Osmani tha se “Kosova humb 400 mijë euro në ditë si pasojë e aferave korruptive... Kosova nuk do të përfaqësohet më nga ata që shkatërrojnë miqësitë me parterët tanë”. Ndërsa Kryeministri në detyrë, Ramush Haradinaj, ka diskutuar për ligjin e punësimit dhe për mungesën e mbështetjes financiare për shtresat në nevojë. Kandidati i PDK- së për Kryeministër, Kadri Veseli, ka premtuar se brenda dy vjetësh, çdo familje do t’i marrë fletët poseduese për pronat e tyre. Kjo, sipas tij, do të bëhet përmes themelimit të Agjencisë për trajtimin e Ndërtimeve pa leje. Fatmit Limaj i Nismës ka premtuar se si temë të para që do të trajtojë ai si Kryeministër do të jenë taksa ndaj produkteve serbe dhe dialogu me Serbinë. Ndërsa Albin Kurti është zotuar se do t’i japë fund korrupsionit dhe diskriminimit ndaj grave.
Shumë premtime nga të pestë kandidatët në Kosovë, por mbetet për t’u parë zbatimi i tyre pas zgjedhjeve të 6 tetorit. Gjithsej 100 vëzhgues nga shtetet anëtare të Bashkimit Europian do të jenë pjesë e procesit zgjedhor të 6 tetorit në Kosovë, me qëllim të përcjelljes së votimeve dhe procesit të numërimit pastaj. Vëzhguesit janë pjesë e misionit të pestë të BE- së, i cili përfshin vëzhgimin neutral dhe të pavarur të zgjedhjeve si dhe vlerësimin e përputhjes së këtyre zgjedhjeve me ligjet e Kosovës dhe standardet evropiane. Kryevëzhguesja e këtij procesi, në një konferencë për mediat, tha se rëndësia e misionit është e veçantë.