Trump: Është shumë e rëndësishme të flasim për korrupsionin
Presidenti amerikan, Donald Trump, e ka mbrojtur ngritjen e temës së ish- nënpresidentit Joe Biden dhe djalit të tij në një telefonatë me Presidentin ukrainas Volodymyr Zelensky. “Është shumë e rëndësishme të flasim për korrupsionin”, u tha Trump gazetarëve të hënën në lidhje me thirrjen. Trump i mohon raportet që ai i bëri presion Ukrainës për të hetuar kundërshtarin e tij të mundshëm në zgjedhjet e vitit të ardhshëm. Një demokrat i lartë tha se akuzat ndaj Presidentit tani “mund të jenë ilaçi i vetëm”, sipas BBC. Presidenti Trump i minimizoi thirrjet për votëbesim kundër tij, në lidhje me akuzat. I pyetur se sa seriozisht i merr kërcënimet për votëbesim nga Kongresi, Trump u tha gazetarëve në Nju Jork, “Aspak seriozisht”. Mediat amerikane kanë raportuar se një informator i komunitetit të inteligjencës amerikane ka paraqitur një ankesë në muajin gusht, pasi është alarmuar nga përpjekja e supozuar e Trump për t’i bërë presion Presidentit të Ukrainës, Volodymyr Zelenskiy, në një bisedë telefonike. Trump pohoi se i ka thënë Zelenskiy- t se “ne nuk duam që njerëzit tanë, si nënpresidenti Joe Biden dhe djali i tij, të kontribuojnë në korrupsionin që tashmë po bëhet në Ukrainë”. Ai e mohoi se i ka bërë presion Ukrainës për të hetuar Bidenin, i cili është një nga kandidatët kryesorë demokratë që mund të sfidojë Trumpin republikan, në zgjedhjet presidenciale në SHBA, vitin e ardhshëm. Pranimi i telefonatës nga ana e Trumpit i shtoi thirrjet e demokratëve për të nisur procedurat e votëbesimit në Kongres. Skandali shpërtheu para një takimi të planifikuar midis Trumpit dhe Zelenskiyt në prag të Asamblesë së Përgjithshme të Kombeve të Bashkuara, këtë javë, në Nju Jork. Oleksandr Danylyuk, zyrtar i lartë në administratën e Presidentit ukrainas, i tha agjencisë “Reuters” të hënën se qëllimi kryesor i Kievit është të ketë marrëdhënie mbështetëse dhe besimi me Shtetet e Bashkuara. Njoftimet thonë se Presidenti Trump ishte përpjekur ta bindte Presidentin Zelenskiy të bashkëpunonte me avokatin e tij, Rudi Giuliani, për të hetuar djalin e Biden dhe vetë ish- nënpresidentin.