Cakaj në New York: Takime me vendet e BE për negociatat

“Me SHBA do organizojmë në Tiranë takimin e Kartës së Adriatikut”

Ministri në Detyrë për Europën dhe Punët e Jashtme, Gent Cakaj, tha dje se gjatë punimeve të Asamblesë së Përgjithshme të Kombeve të Bashkuara, po lobohet me vendet anëtare të BE për hapjen e negociatave me Shqipërinë. “Shqipëria, gjatë gjithë këtyre viteve, është karakterizuar nga një pjesëmarrje më aktive e më dinamike në organizatat ndërkombëtare dhe platformat multilaterale, duke filluar nga angazhimet e shtuara në NATO, duke u koncentruar veçanërisht në Kryesinë Shqiptare të OSBE- së të vitit 2020 dhe duke theksuar në mënyrë të posaçme faktin se Shqipëria aspiron që të marrë një vend të anëtarit jopermanent të Këshillit të Sigurimit në vitin 2022. Duke pasur parasysh që në këtë platformë ekziston një numër i gjerë i kontakteve politike dhe diplomatike, ne kemi interes të posaçëm kësaj radhe të angazhohemi për sigurimin e mbështetjes për kandidaturën e Shqipërisë për Këshillin e Sigurimit në vitin 2022. Në të njëjtën kohë, kjo përbën interesin kryesor të angazhimeve të Shqipërisë në këtë sesion të punimeve të Asamblesë së Përgjithshme. Ne do të zhvillojmë një numër të konsiderueshëm të takimeve, me një varg shtetesh anëtare të Bashkimit Europian, në shërbim të çeljes së negociatave për anëtarësim në tetor dhe po ashtu po kryejmë detyrat tona në kuadër të udhëheqjes së Kartës së Adriatikut, që Shqipëria ka për këtë vit”, tha Cakaj, i cili po merr pjesë në punimet e Asamblesë së Përgjithshme të Kombeve të Bashkuara. Por ministri në Detyrë për Europën dhe Punët e Jashtme u shpreh se në bashkëpunim me SHBA- të, Shqipëria do të organizojë në Tiranë dhe një takim të Kartës së Adriatikut për çështje te sigurisë në rajon. “Në bashkëpunim me Shtetet e Bashkuara të Amerikës dhe të gjitha vendet pjesëmarrëse të rajonit, ne do të organizojmë takimin e Kartës së Adriatikut, për të konsoliduar më tutje bashkëpunimin rajonal në çështjet e sigurisë. Me një fjalë, Shqipëria do të artikulojë një numër të konsiderueshëm të interesave të saj të politikës së jashtme, në kuadër të platformës së Asamblesë së Përgjithshme të Kombeve të Bashkuara kësaj radhe, duke filluar nga rajoni, procesi i integrimit europian, kryesia shqiptare e OSBE- së e vitit 2020 dhe, natyrisht, duke nënvijëzuar në mënyrë të veçantë aspiratën tonë për të siguruar vendin e anëtarit jopermanent në Këshillin e Sigurimit të vitit 2022”, u shpreh Cakaj.