Pensionet, formulari i ri për të përfituar nga shtesa
Dokumentet që duhet të dorëzohen në zyrat e ISSH- së
Rritja e pensioneve nuk do të bëhet vetëm për pensionistët që janë në skemë, por edhe ata që dalin rishtazi, duke përfshirë këtu ata që mbushin moshën, si dhe ata që zgjedhin të dalin në pension të parakohshëm.
Siç edhe përcaktohet në ligjin e zyrtarizuar në fillim të muajit korrik, Instituti i Sigurimeve Shoqërore ka nisur këtë muaj llogaritjen për aplikimin e shtesës, e cila varion mesatarisht nga 12 për qind deri në 20 për qind. Nga skema suplementare përfitojnë minatorët, naftëtarët dhe metalurgët.
DOKUMENTET
Prej fillimit të këtij muaji ka nisur edhe dorëzimi i dokumenteve në zyrat e ISSH- së. Nga ana e pensionistëve që janë në skemë kërkohet vetëm një kërkesë dhe kopje e kartës së identitetit me firmën e tyre. Ndërsa për ata që dalin rishtazi, duhet që në dosje, krahas këtyre dy dokumenteve, të përfshihen po ashtu vërtetim për llojin e punës së kryer, librezë pune, vërtetim për kryerjen e shërbimit ushtarak etj. Konfirmimi për llojin e punës, si edhe pagat e përfituara pas ’ 94 lëshohen nga punëdhënësi, pra, mund të tërhiqen në vendin e punës. Për këtë, Albpetrol ka njoftuar hapjen e aplikimeve për ata që kanë punuar në sektorin e naftës. “Shoqëria Albpetrol sh. a njofton të gjithë personat e interesuar se ka nisur lëshimi i vërtetimeve të posaçme të konfirmimit të llojit të punës, në zbatim të Ligjit Nr. 29/ 2019, datë 23.05.2019, ‘ Për trajtimin financiar, suplementar të punonjësve që kanë punuar në miniera në nëntokë, të punonjësve të industrisë së naftës e të gazit dhe të punonjësve që kanë punuar në metalurgji’. Të gjithë personat e interesuar për t’u pajisur me këtë vërtetim të posaçme të konfirmimit të llojit të punës për të gjithë periudhën e punuar në Albpetrol sh. a. dhe me bazën e vlerësueshme të të ardhurave për periudhën pas vitit 1994, duhet të aplikojnë në sportelin e ngritur enkas pranë shoqërisë Albpetrol”, thuhet në njoftim. Gazeta zbardh sot edhe formularin e aplikimit që duhet të plotësohet për të bërë të mundur tërheqjen e këtyre dokumenteve, të cilat shërbejnë për efekt të llogaritjes së pensionit dhe shtesës që do të aplikohet rishtazi.
FORMULARI
Formulari i aplikimit për të marrë vërtetim për vitet e punës në sektorin e naftës kërkon të dhëna bazë, konkretisht emër, mbiemër, profesioni, sektori, vendi i punës, datën kur keni nisur punë dhe kur keni përfunduar, si edhe vendlindjen. Duke qenë se dokumentet për efekt pensioni nuk lëshohen menjëherë, por në harkun e 10 ditëve, atëherë kërkohen edhe informacione si adresa, numër kontakti, adresë emaili etj. “Aplikuesi duhet të ketë më vete: Një kopje të Librezës të Punës, një kopje të kartës të identitetit, të noterizuara si dhe vërtetimin për vjetërsinë në punë të lëshuar nga Instituti i Sigurimeve Shoqërore. Këto kopje do të mbahen nga Albpetrol sh. a dhe nuk do t’i kthehen mbrapsht aplikuesit”, nënvijëzohet më tej në njoftim. Gjithsej, nga të dhënat zyrtare, mësohet se janë rreth 23 400 pensionistë, që përfitojnë nga skema e trajtimeve suplementare. Sipas ligjit të ri, rritja për minatorët është me 1 për qind për çdo vit pune në nëntokë, ndërsa për naftëtarët dhe metalurgët me 0.6 për qind. Në këtë mënyrë, sa më shumë vite pune, aq më i lartë do të jetë edhe përfitimi. Krahas kësaj, është ulur edhe pragu kontributiv, kështu që për të marrë pension të plotë, këto tri kategori mjafton të kenë 30 vite pune dhe jo 37 sa kërkohen aktualisht.