Shtëpitë para 1991, lista me emrat e familjeve që marrin tapinë në Tiranë

Drejtoria e Kadastrës: Pajisja me certifikatë, pas 30 ditësh

Drejtoria e Kadastrës Tirana Rurale ka publikuar dje emrat e 91 familjeve, për të cilat kanë përfunduar procedurat e regjistrimit të banesës. Bëhet fjalë për shtëpitë e ndërtuara para vitit 1992.

Gazeta boton sot emrat e përfituesve, të cilët do të duhen të presin edhe 30 ditë për të marrë certifikatën e pronës. "Drejtoria Vendore Tirana Rurale 1 ka vijuar evidentimin ne terren në zbatim të VKM- së 442, datë 18.07.2018. Pas shpalljes 30- ditore nga Njësitë Administrative respektive, qytetarët certifikohen si pronar të objektit", thuhet në njoftimin e Kadastrës.

REGJISTRIMI Prej rreth një viti, Kadastra ka nisur procesin e vetëdeklarimit dhe regjistrimit të shtëpive të ndërtuara gjatë periudhës komuniste. Për aplikimet, afati nuk është i limituar, çka do të thotë se qytetarët mund të paraqiten në çdo kohë për të dorëzuar kërkesë së bashku me dokumentacionin që posedojnë, konkretisht leje ndërtimi të vjetra, akte pronësie, skica genplane, akte shitblerjeje apo posedimi, vendime të vjetra të Këshillave Popullore, apo dokumente të tjera provuese të çdo lloji dhe kohe. Sakaq, formularët e aplikimit mund të plotësohen në sportelet e Kadastrës.

PROCEDURAT Brenda 30 ditëve nga dorëzimi i kërkesës, punonjësit e ALUIZNI- t kanë detyrimin që të bëjnë të gjitha verifikimet e nevojshme. Për kalimin e pronësisë deri në 300 m2 nuk do të ketë asnjë tarifë. Pra, familjet janë të përjashtuara nga detyrimi financiar. E vetmja faturë është ajo për shërbimin, e cila shkon 8000 lekë. Nga të dhënat e raportuara më herët, mendohet se janë 40 deri në 60 mijë objekte të identifikuara. Gjasat janë që kjo shifër të jetë edhe më e lartë. Do të jenë verifikimet në terren ato që do të japin edhe shifrën e saktë.