Kokaina nga Ekuadori u ndoq nga DEA, loja në Portin e Durrësit e kush u arrestua
Një punonjës sigurie i Portit, një peshkatar e pronari i anijes së peshkimit dyshohen si pritës, nuk u arrit të zbulohej porositësi
Trafiku i kokainës që ishte nisur me 4 kontenierë të mbushur me banane, po hetohej që prej muajit gusht, pas një sinjalizimi të mbërritur nga DEA amerikane për Policinë greke dhe shqiptare.
Ndonëse u vendos që të vihej në zbatim metoda speciale e dorëzimit të kontrolluar, duke zëvendësuar disa nga pakot e kokainës me oriz, madje duke vendosur edhe GPS brenda tyre, sërish nuk u arrit të zbulohej porositësi i sasisë së drogës. Dorëzimi i kontrolluar, sipas Policisë, arriti të zbulonte 3 pritësit. Pronari i një anije peshkimi, një peshkatar i punësuar prej tij dhe një punonjës i sigurisë së Portit të Durrësit janë identifikuar si pritës. Por pakkush mund ta besojë se janë pikërisht këta të tre persona pas një sasie të tillë droge, me një vlerë të konsiderueshme. Me sinjalizimin e DEA- s, autoritetet greke zbuluan në Portin e Pireut një sasi prej 137 kilogramë kokainë, që vinte nga Ekuadori me destinacion final Shqipërinë. Droga ishte fshehur në motorët e frigoriferëve në katër kontenierë me banane, të porositura nga një kompani shqiptare, e cila operon në treg nga viti 2011. Megjithatë, deri tani, ende nuk është ndaluar asnjë përfaqësues nga kjo kompani, siç ndodhi në rastin e Arbër Çekajt, kur u sekuestruan 613 kg kokainë. DOREZIMI I KONTROL
LUAR Pasi droga u zbulua nga autoritetet greke, Policia e vendit fqinj informoi Policinë shqiptare. Menjëherë pas këtij informacioni, një grup hetimor udhëtoi me urgjencë për në Greqi. Në Portin e Pireut, ku kontenierët kaluan tranzit, autoritetet vendosën ta zëvendësonin drogën me oriz dhe brenda tyre vendosën edhe GPS, në mënyrë që të zbulonin "peshkun e madh". E, megjithatë, në fund zbuluan vetëm një peshkatar, pasi edhe pronari i anijes së peshkimit nuk u arrit të ndalohej, duke u shpallur në kërkim. Kur ngarkesa mbërriti në Portin e Durrësit, forcat operacionale mbajtën nën vëzhgim kontenierët dhe për 4 ditë me radhë fotografuan e filmuan lëvizjet e disa personave të dyshimtë. Sipas të dhënave zyrtare nga Prokuroria e Krimeve të Rënda dhe nga Policia e Shtetit, rezulton se personi kyç në linjën e trafikut ishte Gentian Malindi, pronari i një anijeje peshkimi, i skeduar më herët për trafik hashashi në vitin 2013. Bashkëpunëtorë të tij ishin: oficeri i sigurisë në port, Ardian Bega, dhe punonjësi i tij, Altin Myslihaka. Me ndihmën e Begës, i cili kishte mundësi të depërtonte në Port, ata mundën të hapnin njërin nga kontenierët dhe të merrnin 22 pako të mbështjella me natriban dhe nisën udhëtimin në drejtim të Kavajës. Në afërsi të Shkëmbit të Kavajës, trafikantët hapën pakot për të verifikuar nëse ngarkesa ishte në rregull, por aty kuptuan se gjithçka ishte zbuluar nga Policia, pasi në pako kishte oriz. Ata i hodhën pakot para një hoteli dhe u larguan.
TE DYSHUARIT Gentian Malindi, pronar i anijes "Anyway", është shpallur në kërkim, ndërsa dy të dyshuarit si bashkëpunëtorë u arrestuan në qytetin e Durrësit. Altin Myslihaka, rezulton nga hetimet të jetë i punësuar nga Malindi, si ndihmës i tij në peshkim dhe për mirëmbajtjen e anijes. Oficeri i sigurisë së Portit, Ardian Bega, i cili rezulton të ketë përdorur dokumentin e tij për të hyrë e dalë nga Porti, ka pranuar para hetuesve se ka njohje me Malindin dhe ishte pikërisht ai që i kërkoi të hapte kontenierët për të nxjerrë prej andej një ngarkesë. Ai thotë se në këmbim të këtij veprimi i ishin premtuar para, por ka mohuar të ketë lidhje me trafikimin e drogës.