Reagon Presidenca: Zero shkelje, Meta mbrojti Kushtetutën

“Nuk komentojmë asnjë dokument të klasifikuar që na vjen nga institucionet, përfshi edhe Komisionin e Venecias”

Zëdhënësi i Presidentit Meta, në një reagim të parë ndaj raportit paraprak të Komisionit të Venecias, shprehet se kreu i shtetit nuk ka kryer asnjë shkelje të Kushtetutës.

Duke reaguar pas publikimit të raportit nga Komisioni i Venecias, zëdhënësi i Presidentit Ilir Meta, Tedi Blushi, shkruan se ka zero shkelje të Kushtetutës nga ana e kreut të shtetit, ndërsa i konsideron trakte të porositura publike në media. Blushi kërkon që të dëgjohet Bundestagu gjerman për të zgjidhur krizën. “Zero shkelje të Kushtetutës! Harrojini traktet e porositura, ngado që të vijnë! E dinë të gjithë shqiptarët dhe ndërkombëtarët me integritet se Presidenti i Republikës ka mbrojtur Kushtetutën, rendin demokratik e pluralizmin politik dhe ka SHMANGUR gjakderdhjen dhe Rajshtagun!”, thuhet në reagimin e zëdhënësit Blushi. Duke përcjellë apelin e Presidentit Meta, Tedi Blushi kërkon dialog për zgjidhjen e krizës. “Dëgjoni Bundestagun! Uluni urgjent dhe zgjidhni krizën e rëndë politike para se t’i shtoni kushte të tjera Shqipërisë!”, përfundon Blushi. Një orë më vonë, zëdhënësi i kreut të shtetit e cilësoi dokument të klasifikuar raportin paraprak të Komisionit të Venecias, i cili sipas tij, nuk mund të komentohet. “Zëdhënësi i Presidentit të Republikës, z. Tedi Blushi, i pyetur nga media mbi një dokument të Komisionit të Venecias, që mban datën 29 shtator 2019, sqaron se: “Nuk komentojmë asnjë dokument të klasifikuar që na vjen nga institucione të ndryshme, përfshi edhe Komisionin e Venecias. Aq më tepër që sot është data 27 shtator 2019, ndërsa ky dokument mban datën 29 shtator 2019. Jemi të paqartë: është “ngatërresë” nga nxitimi, apo në datën 29 shtator 2019 do vijë një dokument tjetër?”, thuhet në reagim. Ai përsëriti qëndrimin e shprehur edhe më parë se Presidenti i Republikës nuk ka shkelur Kushtetutën. “Sa i takon çështjes në fjalë, qëndrimi im i mëparshëm është shumë i qartë: Zero shkelje të Kushtetutës!”, përfundon reagimi i zëdhënësit të Presidentit të Republikës. Pak ditë më parë, Presidenti Meta u shpreh gjatë një interviste se nëse Komisioni i Venecias del në konkluzionin se ai kishte shkelur Kushtetutën me dekretin e dytë për zgjedhjet, do të jepte dorëheqjen. “Nëse Venecia thotë që Ilir Meta ka shkelur Kushtetutën, patjetër që do ta jap dorëheqjen. Patjetër, këtë merak kishe ti?! Nëse Venecia thotë se Ilir Meta ka shkelur Kushtetutën, ku e ka shkelur dhe si e ka shkelur, patjetër. Ore, zotëri, më vjen keq që po më bën këtë pyetje. Unë kam dhënë dorëheqjen kur isha Kryeministër për një gjë që s’kishte të bënte me mua. Të thotë Komisioni i Venecias që Presidenti i Shqipërisë ka shkelur Kushtetutën dhe unë të rri akoma në detyrë?! Kurrë në botë! Sepse ose do të bindem që e kam shkelur vërtet, që nuk do bindem dot, ose do bindem që i gjithë sistemi ndërkombëtar qenka i kompromentuar”, u shpreh Presidenti Meta.